పాకిస్తాన్లోని కరాచీ మున్సిపల్ కార్పొరేషన్ మేయర్ ముర్తజా వహాబ్, నగరంలోని ఇరుకైన వీధుల్లో అత్యవసర వైద్య సేవలను అందించే లక్ష్యంతో “విప్లవాత్మక సైకిల్ అంబులెన్స్” అనే కొత్త పథకాన్ని ప్రారంభించారు.
ఇరుకైన సందుల్లోకి పెద్ద అంబులెన్స్లు వెళ్లలేని పరిస్థితుల్లో, ఈ సైకిళ్లు వెంటనే వెళ్లి ప్రథమ చికిత్స అందిస్తాయని మేయర్ గర్వంగా తెలిపారు. మొదటి విడతగా కొన్ని సైకిళ్లను ప్రవేశపెట్టి, వాటికి ప్రథమ చికిత్స కిట్ మరియు అత్యవసర వైద్య సామగ్రిని అమర్చారు.
అయితే, ఈ పథకం ప్రారంభమైన వెంటనే సోషల్ మీడియాలో నెటిజన్ల తీవ్రమైన పరిహాసానికి, విమర్శలకు గురైంది. పాకిస్తాన్లోనే అతిపెద్ద, ఆర్థికంగా అగ్రగామి నగరమైన కరాచీలో ఆధునిక వైద్య సౌకర్యాలను, మెరుగైన మౌలిక సదుపాయాలను కల్పించడానికి బదులుగా, “సైకిల్ అంబులెన్స్” పథకాన్ని ఒక పెద్ద సాధనగా చూపిస్తూ మేయర్ పబ్లిసిటీ చేసుకుంటున్నారని ప్రజలు తీవ్రంగా మండిపడ్డారు.
నెటిజన్లు కొందరు “భవిష్యత్తుకు స్వాగతం” అని వ్యంగ్యంగా వ్యాఖ్యానిస్తూ, ఆధునిక సాంకేతిక ప్రపంచంలో పాకిస్తాన్ వెనుకబడిపోతోందని విమర్శించారు. తీవ్రమైన అత్యవసర పరిస్థితుల్లో సైకిల్ ద్వారా రోగులను కాపాడలేరని, ఇది కేవలం పబ్లిసిటీ రాజకీయం మాత్రమేనని చాలామంది అభిప్రాయపడుతున్నారు. మేయర్ ముర్తజా వహాబ్ గర్వంగా ప్రారంభించిన ఈ పథకం, ప్రస్తుతం సోషల్ మీడియాలో మీమ్స్గా, విమర్శలుగా వైరల్ అవుతోంది.