రాజస్థాన్‌లోని శ్రీగంగానగర్‌లో ఉన్న బాబా రామదేవ్ ఆలయం సమీపంలో సోమవారం సాయంత్రం ఒక భయానక ఘటన చోటుచేసుకుంది.
రోడ్డుపై వెళ్తున్న ఒక ఎలక్ట్రిక్ స్కూటర్ (ఈ-స్కూటర్) ఒక్కసారిగా భారీ శబ్దంతో పేలిపోయి అగ్నికీలల్లో చిక్కుకున్న ఉదంతం స్థానికంగా తీవ్ర కలకలం రేపింది. అయితే అదృష్టవశాత్తూ ఈ ప్రమాదంలో ఎలాంటి ప్రాణనష్టం జరగలేదు.
స్కూటర్‌కు మంటలు అంటుకోవడం గమనించిన డ్రైవర్ ఏమాత్రం ఆలస్యం చేయకుండా వెంటనే కిందకు దూకేశాడు. అదే సమయంలో వాహనంపై మరియు సమీపంలో ఉన్న పిల్లలను కూడా క్షణాల వ్యవధిలో సురక్షితంగా పక్కకు లాగేశారు. దీంతో పిల్లలిద్దరూ ఎలాంటి గాయాలు లేకుండా తృటిలో ప్రాణాపాయం నుండి బయటపడ్డారు. వాహనం అకస్మాత్తుగా అగ్నిగోళంలా మారడంతో ఆ ప్రాంతంలో కాసేపు తీవ్ర భయాందోళనలు, తొక్కిసలాట వాతావరణం నెలకొంది.
ఎలక్ట్రిక్ స్కూటర్ పేలిపోయిన ఈ పూర్తి దృశ్యాలు సమీపంలోని సీసీటీవీ కెమెరాలో రికార్డయ్యాయి. స్కూటర్ నుండి ఒక్కసారిగా దట్టమైన పొగలు రావడం, మరుక్షణమే భారీ పేలుడుతో మంటలు చెలరేగడం వంటి దృశ్యాలు సోషల్ మీడియాలో విపరీతంగా వైరల్ అవుతున్నాయి. ఈ ఘటన మరోసారి ఎలక్ట్రిక్ వాహనాల భద్రతపై తీవ్ర అనుమానాలు, ఆందోళనలను రేకెత్తిస్తోంది.