బెంగళూరు: సిలికాన్ సిటీ బెంగళూరు అంటే కేవలం ట్రాఫిక్, యాంత్రిక జీవనం మాత్రమే కాదు.. ఇక్కడి ప్రజల్లో ఎంతటి మానవత్వం ఉందో చాటిచెప్పే ఒక ఘటన ఇప్పుడు సోషల్ మీడియాలో సెన్సేషన్‌గా మారింది. అర్థరాత్రి వేళ ఒంటరిగా చిక్కుకుపోయిన ఒక యువతి రక్షణ కోసం ఇద్దరు అపరిచితులు చూపిన ఆదరణ లక్షలాది మంది హృదయాలను గెలుచుకుంది.
అసలేం జరిగింది?
ఐశ్వర్య కల్పార్జున్ అనే యువతి తనకు ఎదురైన ఒక అద్భుత అనుభవాన్ని ఇన్‌స్టాగ్రామ్‌లో పంచుకున్నారు. ఐశ్వర్య ఇటీవల అర్థరాత్రి సమయంలో బెంగళూరు ఎయిర్‌పోర్ట్ నుండి కాడుగోడికి చేరుకున్నారు. అప్పుడు సమయం సరిగ్గా తెల్లవారుజామున 3 గంటలు. బస్ స్టాండ్ నుండి ఆమె ఇల్లు కేవలం 3 కిలోమీటర్ల దూరంలోనే ఉంది. కానీ, అంత తక్కువ దూరానికి ఏ ట్యాక్సీ లేదా ఆటో రావడానికి సిద్ధంగా లేదు. ఆన్‌లైన్ యాప్స్‌లో కూడా రైడ్ బుక్ అవ్వలేదు. నిర్మానుష్యంగా ఉన్న రోడ్డుపై ఒంటరిగా నిలబడటంతో ఆమెకు భయం వేయడం సహజం. కానీ, ఆ క్లిష్ట సమయంలో ఇద్దరు వ్యక్తులు దేవుడిలా వచ్చి సాయం చేశారు.
బస్సు కండక్టర్ చూపిన భరోసా:
ఐశ్వర్య ట్యాక్సీ కోసం వేచి చూస్తున్నప్పుడు అక్కడే ఉన్న ఒక బస్సు కండక్టర్ ఆమె దగ్గరకు వచ్చారు. యువతి ఒంటరిగా ఉండటాన్ని గమనించిన ఆయన.. “మీకు ట్యాక్సీ దొరికే వరకు నేను మీతోనే ఉంటాను, భయపడకండి” అని ధైర్యం చెప్పారు. ఆమెకు వాహనం దొరికే వరకు అక్కడే ఉండి తన మానవత్వాన్ని చాటుకున్నారు.
డబ్బు కంటే భద్రతే ముఖ్యం అన్న డ్రైవర్:
ఎలాంటి క్యాబ్ బుక్ అవ్వని సమయంలో ఒక రాపిడో డ్రైవర్ అక్కడికి వచ్చారు. ఐశ్వర్య తనను ఇంటి దగ్గర దించమని అడగగా ఆయన వెంటనే అంగీకరించారు. “ఎంత డబ్బు అవుతుంది?” అని ఆమె అడగగా, ఆ డ్రైవర్ ఇచ్చిన సమాధానం అందరినీ ఆశ్చర్యపరిచింది. “అదంతా పర్వాలేదు మేడం, ముందు మీరు లొకేషన్ చూపించండి.. ఇప్పటికే చాలా ఆలస్యమైంది” అని చెప్పి ఆమెను సురక్షితంగా ఇంటికి తీసుకెళ్లారు. ఇల్లు చేరిన తర్వాత డబ్బు గురించి అడగగా.. “సమయం చాలా ఎక్కువైంది, ఒక మహిళగా మిమ్మల్ని సేఫ్ గా చేర్చడం నా బాధ్యత. నాకు ఇంతే కావాలని నేను అడగను, మీకు ఎంత అనిపిస్తే అంత ఇవ్వండి” అని చెప్పారు.
సోషల్ మీడియాలో ప్రశంసల జల్లు:
ఐశ్వర్య ఈ మొత్తం ఘటనను వీడియో తీసి సోషల్ మీడియాలో షేర్ చేస్తూ.. “తెల్లవారుజామున 3 గంటలకు ఒక కొత్త నగరంలో ఇద్దరు అపరిచితులు నేను సురక్షితంగా ఉన్నానని నిర్ధారించుకున్నారు. ఒక మహిళగా ఆ క్షణం నాకు ఎంత గొప్పదో నాకు తెలుసు” అని రాసుకొచ్చారు.
ఈ వీడియో ఇప్పుడు లక్షలాది వ్యూస్ సాధించింది. నెటిజన్లు ఆ బస్సు కండక్టర్ మరియు రాపిడో డ్రైవర్ యొక్క నిజాయితీని, మానవత్వాన్ని కొనియాడుతున్నారు. “బెంగళూరు సురక్షితమైన నగరం అనడానికి ఇంతకంటే గొప్ప ఉదాహరణ అవసరం లేదు” అని పలువురు కామెంట్ చేస్తున్నారు. ఇలాంటి చిన్న చిన్న ఘటనలే సమాజంలో ఇంకా మానవత్వం బతికే ఉందని నిరూపిస్తున్నాయి.