పంజాబ్‌లోని అమృత్‌సర్ నగర పరిధిలోని ఫతేఘర్ చూరియాన్ రోడ్డు సమీపంలో గల బాబా దీప్ సింగ్ కాలనీలో, ప్రేమ వ్యవహారాలు మరియు కుటుంబ కలహాల కారణంగా ఓ ఇల్లు పూర్తిగా అగ్నికి ఆహుతై బూడిదైన ఘటన పెను సంచలనం సృష్టించింది.
ఈ దారుణ ఘటనతో బాధితులు ఉండటానికి గూడు లేక నడిరోడ్డున నిలబడాల్సిన దుస్థితి ఏర్పడింది. తమ ఆశలు, సర్వస్వం అగ్ని కీలల్లో కాలిపోవడంతో ఆ కుటుంబ సభ్యులు కన్నీరుమున్నీరవుతున్నారు.
అందిన వివరాల ప్రకారం.. ఈ ఘోరానికి అక్రమ సంబంధాలు, కుటుంబ తగాదాలే ప్రధాన కారణమని తెలుస్తోంది. బాధితుడైన యువకుడి భార్య, తన భర్తకు వేరొక మహిళతో వివాహేతర సంబంధం ఉందని ఆరోపించింది. వీరిద్దరూ గతంలో ప్రేమించి పెళ్లి చేసుకున్నప్పటికీ ఈ గొడవలు తలెత్తడం గమనార్హం. అయితే, ఇంటికి నిప్పు ఎలా పెట్టారు? దీని వెనుక ఉన్న అసలు కారణాలేంటి? అనే పూర్తి వివరాలు పోలీసుల విచారణ అనంతరమే స్పష్టత రానున్నాయి.
ఈ ప్రమాదంపై కుటుంబ సభ్యులు ఇచ్చిన ఫిర్యాదు మేరకు పోలీసులు కేసు నమోదు చేసుకుని దర్యాప్తు ప్రారంభించారు. ఈ వ్యవహారంలో సంబంధం ఉన్న ఓ యువతిని పోలీసులు అదుపులోకి తీసుకున్నారు. అలాగే ఈ ఘటనలో కీలక నిందితుడిగా భావిస్తున్న ఆ యువకుడి కోసం పోలీసులు ముమ్మరంగా గాలిస్తున్నారు.
ఈ కేసుపై సదర్ పోలీస్ స్టేషన్ సబ్-ఇన్‌స్పెక్టర్ గుర్‌జీత్ సింగ్ మాట్లాడుతూ.. “బాధితుల ఫిర్యాదు మేరకు వెంటనే కేసు నమోదు చేసి దర్యాప్తు చేపట్టాం. విచారణలో వెల్లడైన ఆధారాలతో ఒక మహిళను అరెస్ట్ చేశాం. పరారీలో ఉన్న యువకుడి కోసం ప్రత్యేక బృందాలతో గాలింపు చర్యలు ముమ్మరం చేశాం. అగ్నిప్రమాదానికి గల అసలు కారణాలు, వివాహేతర సంబంధాల వ్యవహారాలపై అన్ని కోణాల్లోనూ లోతుగా విచారణ జరుపుతున్నాం” అని వెల్లడించారు.
Leave a Reply