అర్ధరాత్రి సమయంలో ప్రశాంతంగా ఉన్న ఓ వీధిలోకి ఒక ఖరీదైన కారు వచ్చి ఆగింది. కారులో నుంచి దిగిన ఓ వ్యక్తి.. రోడ్డుపై నడుచుకుంటూ వెళ్తున్న యువతిని బలవంతంగా పట్టుకుని, కారు వెనుక తలుపు తెరిచి లోపలికి లాగేందుకు ప్రయత్నించాడు.
ఆ యువతి కూడా తన శక్తినంతా ఉపయోగించి అతడిని ప్రతిఘటిస్తూ.. అక్కడి నుంచి తప్పించుకుని పరుగెత్తేందుకు ప్రయత్నించింది. ఈ షాకింగ్ దృశ్యాలు సమీపంలోని CCTV కెమెరాలో రికార్డయ్యాయి.
ఈ వీడియో సోషల్ మీడియాలో వైరల్ కావడంతో.. యువతిని ఎవరో కిడ్నాప్ చేసేందుకు ప్రయత్నిస్తున్నారని భావించిన స్థానికులు తీవ్ర ఆందోళనకు గురయ్యారు. పెద్ద కిడ్నాప్ ముఠా అక్కడ సంచరిస్తోందేమోనని భయపడ్డారు.
అయితే.. ఘటనపై పోలీసులు వెంటనే దర్యాప్తు చేపట్టడంతో అసలు విషయం వెలుగులోకి వచ్చింది.
కారులో నుంచి వచ్చి యువతిని బలవంతంగా లోపలికి లాగేందుకు ప్రయత్నించిన వ్యక్తి ఆమెకు పరిచయమైన వ్యక్తి, ప్రేమికుడేనని పోలీసులు గుర్తించినట్లు కథనం పేర్కొంది.
ఇద్దరి మధ్య తీవ్ర వాగ్వాదం, గొడవ జరిగిన నేపథ్యంలో.. ఆగ్రహానికి గురైన యువకుడు ఆమెను బలవంతంగా కారులో ఎక్కించుకుని తీసుకెళ్లేందుకు ప్రయత్నించినట్లు సమాచారం. యువతి అక్కడి నుంచి తప్పించుకుని పరుగెత్తేందుకు ప్రయత్నించగా.. అతడు ఆమెను వెంబడించి పట్టుకునేందుకు ప్రయత్నించిన దృశ్యాలు కూడా CCTVలో నమోదయ్యాయి.
అసలు విషయం వెలుగులోకి వచ్చినప్పటికీ.. బహిరంగ ప్రదేశంలో ఓ మహిళను ఆమె ఇష్టానికి వ్యతిరేకంగా బలవంతంగా కారులోకి ఎక్కించేందుకు ప్రయత్నించడంపై నెటిజన్లు తీవ్రంగా మండిపడుతున్నారు.
“ప్రేమ పేరుతో ఓ మహిళ ఇష్టానికి విరుద్ధంగా బలవంతం చేయడం, హింసకు పాల్పడడం ఏ మాత్రం సమర్థనీయం కాదు” అంటూ పలువురు కామెంట్లు చేస్తున్నారు.
ఈ ఘటనతో ప్రజల్లో భయాందోళనలు కలిగించడంతో పాటు, యువతితో అనుచితంగా, హింసాత్మకంగా ప్రవర్తించిన వ్యక్తిపై చట్టప్రకారం కఠిన చర్యలు తీసుకుంటామని పోలీసులు తెలిపారు.
Leave a Reply