అస్సాంలో అరుదైన ఘటన: తల్లి కావడం అనేది ప్రతి మహిళ జీవితంలో అత్యంత మధురమైన అనుభూతి. గర్భవతిగా ఉన్నప్పుడు తన బిడ్డ ఆరోగ్యంగా పుట్టాలని ప్రతి తల్లి ఆశిస్తుంది. సాధారణంగా ఒక నవజాత శిశువు బరువు రెండున్నర నుండి మూడున్నర కిలోల వరకు ఉంటుంది. కానీ ఇప్పుడు మనం చెప్పుకోబోయే ఘటన అందరినీ ఆశ్చర్యానికి గురిచేస్తోంది.
5.2 కేజీల శిశువు: సాధారణంగా నవజాత శిశువు బరువు 5 కేజీలు ఉండటం అనేది చాలా అరుదుగా జరిగే విషయం. అస్సాంలోని కచార్ జిల్లాకు చెందిన ఒక మహిళ ఇటీవల 5.2 కేజీల బరువున్న పసికందుకు జన్మనిచ్చింది.
వైద్యుల ఆశ్చర్యం: బిడ్డ పుట్టినప్పుడు బరువు చూసి కుటుంబ సభ్యులతో పాటు వైద్యులు కూడా ఆశ్చర్యపోయారు. బిడ్డకు జన్మనిచ్చిన మహిళ పేరు జయా దాస్. 27 ఏళ్ల జయ, జూన్ 17న కచార్ జిల్లాలోని సతీంద్ర మోహన్ దేవ్ సివిల్ ఆసుపత్రిలో చేరారు. వాస్తవానికి డెలివరీ తేదీ మే 29 అని వైద్యులు సూచించినప్పటికీ, కొన్ని కారణాల వల్ల ఆమె సరైన సమయానికి ఆసుపత్రికి రాలేకపోయారు.
సిజేరియన్ ఆపరేషన్: డాక్టర్ హనీఫ్ మాట్లాడుతూ, ఆమెను మే 29నే ఆసుపత్రిలో చేరమని సూచించామని, కానీ ఆమె పురిటి నొప్పులతో జూన్ 17న వచ్చారని చెప్పారు. జయకు ఇది రెండో కాన్పు. ఆమె మొదటి బిడ్డకు కూడా సిజేరియన్ ద్వారానే జన్మనిచ్చారు. ఆమె చివరి వరకు ‘సోనోగ్రఫీ’ చేయించుకోకపోవడంతో ఇది అత్యవసర పరిస్థితిగా మారింది. వెంటనే వైద్యుల బృందం ఆమెకు సిజేరియన్ ఆపరేషన్ చేశారు.
బిడ్డ బరువు: ఆపరేషన్ తర్వాత బిడ్డ బరువును తనిఖీ చేయగా, అది 5.2 కిలోలుగా నమోదైంది. బిడ్డ ఇంత బరువు ఉంటాడని తాము ఊహించలేదని డాక్టర్ హనీఫ్ పేర్కొన్నారు. అస్సాంలో సాధారణంగా శిశువులు 2.5 నుండి 3 కిలోల బరువుతో పుడతారు, కాబట్టి ఇది ఒక అరుదైన కేసు.
సోషల్ మీడియాలో చర్చ: వైద్యులు తమ కెరీర్లో ఇలాంటి కేసును ఇంతవరకు చూడలేదని తెలిపారు. జయా దాస్ మరియు ఆమె భర్త బాదల్ దాస్ల మొదటి బిడ్డ పుట్టినప్పుడు 3.8 కేజీల బరువు ఉండగా, ఈసారి వారి రెండో సంతానం 5.2 కేజీల బరువుతో జన్మించడం విశేషం. ఈ వార్త సోషల్ మీడియాలో కూడా వైరల్ అవుతోంది.
ఇంత భారీ బరువున్న శిశువును మీరు ఎప్పుడైనా చూశారా?