లండన్: ఎవరినైనా గౌరవంగా పిలవాలనుకున్నా లేదా సరదాగా ఆటపట్టించాలనుకున్నా చాలామంది నోట వచ్చే మొదటి మాట ‘ఆంటీ’. ముఖ్యంగా నగరాల్లో తమకంటే వయసులో పెద్దవారైనా, చిన్నవారైనా మహిళలను చూడగానే ‘ఆంటీ’ అని పిలవడం ఒక అలవాటుగా మారింది. అయితే, ఇలా పిలవడం ఇకపై మీ జేబుకు చిల్లు పెట్టడమే కాదు, కోర్టు మెట్లు ఎక్కేలా కూడా చేయవచ్చు. ఒక మహిళను ఆమె ఇష్టం లేకుండా ‘ఆంటీ’ అని పిలిచినందుకు గాను, ఒక వ్యక్తి ఏకంగా 2 లక్షల రూపాయల పరిహారం చెల్లించాల్సి వచ్చింది.
ఏమిటీ వింత కేసు? ఎక్కడ జరిగింది?
ఈ ఘటన వినడానికి వింతగా ఉన్నా అక్షరాలా నిజం. అయితే ఇది జరిగింది మన దేశంలో కాదు.. లండన్లో! కానీ, ఈ కేసులో విజయం సాధించి పరిహారం పొందింది మాత్రం ఒక భారతీయ మహిళ కావడం విశేషం. లండన్లోని నేషనల్ హెల్త్ సర్వీస్ (NHS)లో హెల్త్ అసిస్టెంట్గా పనిచేస్తున్న 61 ఏళ్ల భారతీయ మూలాల మహిళ ఎస్టీవ్స్ ఈ పోరాటం చేశారు. తనతో పనిచేసే ఒక మెల్ నర్సు తనను మాటిమాటికీ ‘ఆంటీ’ అని పిలుస్తుండటంతో ఆమె తీవ్ర అభ్యంతరం వ్యక్తం చేశారు.
గౌరవమా? వేధింపా?
తనను ఆ పేరుతో పిలవవద్దని ఎస్టీవ్స్ గతంలోనే ఆ నర్సును హెచ్చరించారు. అయినప్పటికీ సదరు నర్సు వినకుండా అదే పనిగా పిలవడంతో ఆమె కోర్టును ఆశ్రయించారు.
- కోర్టు వాదన: వాట్ఫోర్డ్ ఎంప్లాయిమెంట్ ట్రిబ్యునల్ ఈ కేసును విచారించింది. నిందితుడు తన వాదనలో.. ఘనా సంస్కృతిలో వయసులో పెద్దవారిని గౌరవంగా పిలిచేందుకు ‘ఆంటీ’ అనే పదాన్ని వాడతామని చెప్పుకొచ్చారు.
- న్యాయమూర్తి తీర్పు: అయితే న్యాయమూర్తి జార్జ్ అలియట్ ఈ వాదనను తోసిపుచ్చారు. ఒక ప్రొఫెషనల్ వర్కింగ్ ప్లేస్లో సహోద్యోగి ఇష్టం లేకుండా అలా పిలవడం “వయసు మరియు లింగ వివక్ష” కిందకు వస్తుందని తేల్చి చెప్పారు. ఇది బాధితురాలి మనోభావాలను దెబ్బతీయడమే కాకుండా వేధింపులకు సమానమని కోర్టు అభిప్రాయపడింది.
రూ. 2 లక్షల పరిహారం!
బాధితురాలికి కలిగిన మానసిక క్షోభకు (Injury to feelings) గాను వెస్ట్ లండన్ NHS ట్రస్ట్ సుమారు 1,425 పౌండ్లు (భారత కరెన్సీలో సుమారు రూ. 2 లక్షలు) పరిహారం చెల్లించాలని కోర్టు ఆదేశించింది. నిందితుడైన నర్సు చార్ల్స్ ఒప్పాంగ్ తన వ్యాఖ్యలను “హాస్యం” అని చెప్పుకోవడానికి ప్రయత్నించినప్పటికీ, అది అవమానకరమైన ప్రయత్నమేనని కోర్టు తన తీర్పులో పేర్కొంది.