విద్య అంటే జ్ఞానం, వ్యక్తిత్వ వికాసం అని చెప్పుకునే కాలం ఎప్పుడో ముగిసిపోయింది. అన్నిటికంటే ముఖ్యంగా చిన్న పిల్లలు విద్యను ఆస్వాదించేలా ఉండాలి. కానీ, ప్రస్తుతం వయసు కాని వయసులో పిల్లలపై లేనిపోని ఒత్తిడి పెంచడమే విద్య యొక్క ధ్యేయంగా మారినట్లు కనిపిస్తోంది.
వీపుపై అనవసరపు బరువు (పుస్తకాల సంచి), ప్రోగ్రెస్ రిపోర్ట్లో మార్కుల కుప్ప.. ఇవి ఉంటేనే విద్య పరిపూర్ణం అనే భావనను పాఠశాలలు విత్తుతున్నాయి. తల్లిదండ్రులు కూడా అదే ఆలోచనతో బతుకుతున్నారు. పిల్లలపై అనవసర ఒత్తిడి పెంచకండి, వారి సామర్థ్యాన్ని మార్కులతో కొలవకండి అని మొత్తుకుంటున్నా పరిస్థితి మాత్రం రోజురోజుకూ దిగజారుతోంది. దీనికి నిదర్శనంగా ఇటీవల కర్ణాటకలోని ఒక పాఠశాలకు సంబంధించిన ఒకటో తరగతి విద్యార్థుల ఫలితాల జాబితా సోషల్ మీడియాలో భారీగా వైరల్ అవుతోంది. ఈ జాబితాలో కేవలం ఆరేళ్ల పిల్లలు సాధించిన మార్కులు, వారికి ఇచ్చిన ర్యాంకులు (Ranks) ప్రజల్లో ఆందోళనను, ఆశ్చర్యాని కలిగిస్తున్నాయి.
వైరల్ పోస్ట్లో ఏముంది?
వైరల్ అవుతున్న ఆ జాబితాలో విద్యార్థుల పేర్లు, వారు సాధించిన మార్కులు వివరించబడ్డాయి. నిషాంత్ ఎం. అనే విద్యార్థి 200 మార్కులకు గాను 199 మార్కులు సాధించి ప్రథమ స్థానంలో నిలవగా, మొహమ్మద్ హర్మైన్ 198 మార్కులతో ద్వితీయ, యశ్మిత్ నాయక్ 197 మార్కులతో తృతీయ స్థానం సాధించారు. ఇంత చిన్న వయసు పిల్లలు దాదాపు నూటికి నూరు శాతం మార్కులు సాధించడం ఒకవైపు ప్రశంసలు పొందుతుంటే, మరోవైపు విమర్శలకు గురవుతోంది.
నెటిజన్ల ఆగ్రహం మరియు ఆందోళన:
ఈ మార్కుల పట్టిక సోషల్ మీడియాలో ప్రత్యక్షమవ్వగానే వేలమంది తమ స్పందనలను పంచుకున్నారు. “కేవలం ఒకటో తరగతిలోనే ఇంత పోటీ అవసరమా?” అని అనేకులు ప్రశ్నించారు. ఒక యూజర్ అయితే, “ఈ వయసులో పిల్లలు ఆడుకుంటూ, ప్రకృతిని అర్థం చేసుకుంటూ నేర్చుకోవాలి. కానీ మనం వారిని మార్కుల రేసులో గుర్రాలలా పరిగెత్తిస్తున్నాం. ఇది అత్యంత భయంకరమైన పరిణామం,” అని ఆవేదన వ్యక్తం చేశారు. మరొకరు, “ఒకటో తరగతి పిల్లలకు కూడా ర్యాంకులు ఇవ్వడం వారి మానసిక ఆరోగ్యంపై చెడు ప్రభావం చూపుతుంది,” అని అభిప్రాయపడ్డారు.
విద్యా వ్యవస్థపై చర్చ:
ఈ ఘటన భారతీయ విద్యా వ్యవస్థలో మార్కులకు ఇస్తున్న అతి ప్రాముఖ్యతను మళ్లీ తెరపైకి తెచ్చింది. జాతీయ విద్యా విధానం (NEP) ప్రకారం చిన్న వయసులో పిల్లలపై పరీక్షల భారం ఉండకూడదు మరియు ఆటపాటల ద్వారా నేర్చుకోవడానికే ప్రాధాన్యత ఇవ్వాలి. కానీ వాస్తవంలో పాఠశాలలు, తల్లిదండ్రులు ఇప్పటికీ మార్కుల వెంటే పడుతున్నారని ఈ నివేదిక స్పష్టం చేస్తోంది.
తల్లిదండ్రులు తమ పిల్లలను ఇతరులతో పోల్చడం, పాఠశాలలు ఇటువంటి టాపర్స్ లిస్టులను ప్రదర్శించి ప్రచారం పొందడం వల్ల పిల్లల్లో చిన్నప్పటి నుండే అసూయ, ఒత్తిడి పెరుగుతాయని విద్యావేత్తలు వాదిస్తున్నారు. మొత్తానికి, ఈ వైరల్ లిస్ట్ మన విద్యా మూల్యాంకన పద్ధతిని పునఃసమీక్షించుకునేలా చేస్తోంది. అయితే, ఈ పిల్లి మెడలో గంట కట్టేదెవరు?