అరవింద్ కేజ్రీవాల్ విషయంలో.. ఏ చేతులైతే గతంలో విధేయతకు చిహ్నంగా ఆయనకు స్వాగతం పలికాయో, అవే చేతులు ఇప్పుడు వెన్నుపోటు పొడిచాయి. గురువారం ఆమ్ ఆద్మీ పార్టీని వీడి బీజేపీలో చేరిన అశోక్ మిట్టల్, కేజ్రీవాల్ మరియు ఆయన కుటుంబానికి తన అధికారిక నివాసంలో ఆశ్రయం ఇచ్చారు. 2024లో ఎక్సైజ్ పాలసీ కేసులో బెయిల్పై విడుదలయ్యాక, ముఖ్యమంత్రి పదవికి రాజీనామా చేసిన కేజ్రీవాల్.. ఢిల్లీలోని ‘5 ఫిరోజ్ షా రోడ్’లోని మిట్టల్ బంగ్లాలో నివసించారు.
రాజ్యసభ ఎంపీ హోదాలో అశోక్ మిట్టల్కు ఆ బంగ్లా కేటాయించబడింది. కేజ్రీవాల్ తన సహచరుడి ఇంట్లో ఏడాదికి పైగా నివసించారు. ఏప్రిల్ 24న కేజ్రీవాల్ ఆ ఇల్లు ఖాళీ చేసి, లోధి ఎస్టేట్లోని టైప్-VII ప్రభుత్వ బంగ్లాకు మారారు. ఒక జాతీయ పార్టీ అధినేతగా కేంద్రం ఆయనకు ఈ నివాసాన్ని కేటాయించింది. అయితే, ఆయన ఇల్లు మారిన కొద్ది గంటల్లోనే మిట్టల్ పార్టీకి రాజీనామా చేసి ప్రత్యర్థి పార్టీ అయిన బీజేపీలో చేరడం కేజ్రీవాల్కు కోలుకోలేని దెబ్బగా మారింది.
అశోక్ మిట్టల్తో పాటు రాఘవ్ చద్దా, స్వాతి మాలివాల్, హర్భజన్ సింగ్, సందీప్ పాఠక్, రాజిందర్ గుప్తా మరియు విక్రమ్ సాహ్నీ కూడా ఆప్ను వీడి బీజేపీ తీర్థం పుచ్చుకున్నారు.
ఆప్లో తిరుగుబాటు: వివిధ అంశాలపై పార్టీ నాయకత్వంతో విభేదాల కారణంగా ఆప్లో ఉద్రిక్తతలు పెరుగుతున్నట్లు వార్తలు వస్తున్నాయి. ఏప్రిల్ 2న రాఘవ్ చద్దాను రాజ్యసభలో పార్టీ డిప్యూటీ లీడర్ పదవి నుండి కేజ్రీవాల్ తొలగించి, ఆ స్థానంలో అశోక్ మిట్టల్ను నియమించడంతో పార్టీలో చీలికలు మొదలయ్యాయి. చద్దాను ‘మౌనం’ చేయడానికే పార్టీ ఇలా చేసిందని ఆయన సన్నిహితులు చెబుతున్నారు. చద్దా ఒక్కరే రాజీనామా చేసి ఉంటే ఫిరాయింపు నిరోధక చట్టం కింద పదవి కోల్పోయేవారు. కానీ, మూడింట రెండొంతుల మంది సభ్యులు కలిసి వెళ్లడంతో వారు అనర్హత వేటు నుండి తప్పించుకున్నారు.
ఇక స్వాతి మాలివాల్ పేరు ఈ జాబితాలో ఉండటం పెద్ద ఆశ్చర్యమేమీ కాదు. మే 2024లో కేజ్రీవాల్ సహాయకుడు బిభవ్ కుమార్ తనపై దాడి చేశారని ఆమె ఆరోపించినప్పటి నుండి పార్టీతో ఆమెకు సంబంధాలు తెగిపోయాయి.
కేజ్రీవాల్ చివరి ప్రయత్నం: విశ్వసనీయ సమాచారం ప్రకారం.. ఈ ఆరుగురు నాయకులలో కనీసం ఐదుగురికి వచ్చే టర్మ్లో మళ్లీ టిక్కెట్లు ఇస్తానని కేజ్రీవాల్ హామీ ఇచ్చారు. పార్టీలో అసంతృప్తిగా ఉంటే ఇప్పుడు రాజీనామా చేయాలని, మళ్లీ అవకాశం కల్పిస్తానని భరోసా ఇచ్చారు. ఈ విషయంపై చర్చించడానికి శుక్రవారం సాయంత్రం ఎంపీలను తన నివాసానికి పిలిచారు. కానీ ఆ సమావేశం జరగకముందే, ఎంపీలు తమ నిష్క్రమణను ప్రకటించి బీజేపీలో చేరిపోయారు.