బలమైన కండరాలు, గట్టి ఎముకలు మరియు ఆరోగ్యకరమైన కీళ్లు కేవలం వయస్సు లేదా జన్యువులపై మాత్రమే ఆధారపడి ఉండవు. మనం రోజూ చేసే చిన్న చిన్న అలవాట్లే మన కీళ్ల భవిష్యత్తును నిర్ణయిస్తాయి. మనం కూర్చునే విధానం, వేసుకునే చెప్పులు, వ్యాయామం చేయకపోవడం వంటివి తెలియకుండానే కీళ్ల అరుగుదలకు దారితీస్తాయి.
స్పోర్ట్స్ మెడిసిన్ మరియు ఆర్థోస్కోపిక్ సర్జరీలో నిపుణులైన డాక్టర్ డేవిడ్ అబ్బాసీ, తన సుదీర్ఘ వైద్య అనుభవంతో తాను మానుకున్న 5 అలవాట్లను ఫిబ్రవరి 26న ఇన్‌స్టాగ్రామ్ వీడియో ద్వారా పంచుకున్నారు.
- కదలకుండా గంటల తరబడి కూర్చోవడం
చాలా సేపు ఒకే చోట కదలకుండా కూర్చోవడం వల్ల తుంటి కండరాలు (Hip flexors) బిగుసుకుపోతాయి. ఇది భవిష్యత్తులో కీళ్ల కదలికలను తగ్గిస్తుందని డాక్టర్ అబ్బాసీ హెచ్చరించారు. “గంటల తరబడి కూర్చోవడం వల్ల తుంటి కండరాలు ఎంత దారుణంగా దెబ్బతింటాయో ఆపరేషన్ టేబుల్ మీద నేను ప్రత్యక్షంగా చూశాను” అని ఆయన పేర్కొన్నారు. - కాళ్లకు సంబంధించిన వ్యాయామాలు (Leg Day) మానేయడం
జిమ్‌కి వెళ్ళేవారు చాలామంది ఛాతీ లేదా చేతుల మీద దృష్టి పెడతారు కానీ కాళ్ల వ్యాయామాన్ని (Leg day) విస్మరిస్తారు. కానీ మోకాళ్లు మరియు తుంటి చుట్టూ ఉన్న కండరాలను బలోపేతం చేయడం కీళ్ల స్థిరత్వానికి చాలా ముఖ్యం. “మీ చుట్టూ ఉన్న కండరాలను బలోపేతం చేయమని మీ మోకాళ్లు, తుంటి కీళ్లు మిమ్మల్ని ప్రాధేయపడతాయి” అని ఆయన నొక్కి చెప్పారు. - సరైన సపోర్ట్ లేని పాదరక్షలు ధరించడం
మనం వేసుకునే చెప్పులు కేవలం ఫ్యాషన్ కోసం మాత్రమే కాదు, అవి మన శరీరానికి పునాది వంటివి. తప్పుడు పాదరక్షలు ధరించడం వల్ల కేవలం పాదాలే కాకుండా, మీ చీలమండలు (Ankles) మరియు వెన్నెముకపై కూడా ప్రభావం పడుతుంది. - బోర్లా పడుకోవడం (Sleeping on stomach)
బోర్లా పడుకోవడం సౌకర్యంగా అనిపించినప్పటికీ, ఇది వెన్నెముక యొక్క సహజ అమరికను (Spinal alignment) దెబ్బతీస్తుంది. కాలక్రమేణా ఇది తీవ్రమైన వెన్నునొప్పికి దారితీస్తుందని, అందుకే తాను ఆ పద్ధతిలో పడుకోవడం మానేశానని డాక్టర్ తెలిపారు. - కీళ్ల నొప్పులను నిర్లక్ష్యం చేయడం
చిన్నపాటి నొప్పి వచ్చినప్పుడు “అదే తగ్గిపోతుందిలే” అని నిర్లక్ష్యం చేయడం వల్ల అది పెద్ద సమస్యగా మారుతుంది. నొప్పిని భరిస్తూ పనులు చేయడం వల్ల సమస్య పరిష్కారం అవ్వదు సరిగ్గా కదా, అది సర్జరీ వరకు దారితీస్తుంది. “చిన్న సమస్యలను పెద్ద శస్త్రచికిత్సలుగా మార్చేది మన నిర్లక్ష్యమే. మీ శరీరం ప్రతి దెబ్బను గుర్తుపెట్టుకుంటుంది” అని ఆయన హెచ్చరించారు.