మహారాష్ట్రలోని చింఛ్వాడ్ ప్రాంతంలో ఒక మహిళ ఆలయం వద్ద కొన్న దుప్పటిపై ‘మేడ్ ఇన్ పాకిస్థాన్’ అని ఉండటం ప్రస్తుతం సోషల్ మీడియాలో చర్చనీయాంశమైంది. ఈ ఘటనకు సంబంధించిన వీడియో వైరల్ కావడంతో పోలీసులు రంగంలోకి దిగారు.
ఏం జరిగింది? చింఛ్వాడ్లోని ప్రసిద్ధ ‘మోర్యా గోసావి’ ఆలయం వద్ద సంకష్టి చతుర్థి సందర్భంగా జరిగిన చిన్న మేళాలో ఒక మహిళ దుప్పట్లు కొనుగోలు చేసింది. ఇంటికి వెళ్ళాక, వాటిని ఉతికి ఆరవేసే సమయంలో ‘మేడ్ ఇన్ పాకిస్థాన్’ అని ఉన్న ట్యాగ్ను చూసి ఆమె షాక్కు గురైంది. వెంటనే దీనిపై ఒక వీడియో తీసి సోషల్ మీడియాలో పోస్ట్ చేసింది.
మహిళ ఏమందంటే? “మేము సరిహద్దులో లేకపోయినా, మా ఇంట్లోకి పాకిస్థాన్ వస్తువులు ఎలా వచ్చాయి? నేను కొన్నట్లుగానే చాలా మంది అక్కడ దుప్పట్లు కొన్నారు. అంటే వారి ఇళ్లలోకి కూడా ఇవి వెళ్లాయి. భారత ప్రభుత్వం పాకిస్థాన్ వస్తువులను నిషేధించినా, ఇవి ఎలా అందుబాటులోకి వచ్చాయి?” అని ఆమె ఆ వీడియోలో తన ఆగ్రహాన్ని వ్యక్తం చేసింది.
పోలీసుల స్పందన: వీడియో వైరల్ కావడంతో స్థానిక పోలీసులు వెంటనే స్పందించారు. పోలీసు అధికారి రంజీత్ జాదవ్ మాట్లాడుతూ, “వీడియో వైరల్ అయిన వెంటనే మేము దర్యాప్తు ప్రారంభించాము. ఈ వ్యవహారంపై కూలంకషంగా విచారించేందుకు ప్రత్యేక బృందాన్ని ఏర్పాటు చేశాము” అని తెలిపారు. అంతేకాకుండా, ఆలయ పరిసరాల్లో అనధికారికంగా లేదా అనుమానాస్పద వస్తువులను విక్రయిస్తున్న వారిపై కఠిన చర్యలు తీసుకోవాలని కోరుతూ మున్సిపల్ కార్పొరేషన్ (PCMC)కు లేఖ రాస్తున్నట్లు చెప్పారు. ప్రస్తుతం ఆ దుప్పట్లను విక్రయించిన వ్యాపారి కోసం పోలీసులు గాలింపు చేపట్టారు.