మహారాష్ట్రలోని ప్రసిద్ధ పుణ్యక్షేత్రాలలో ఒకటైన లోనావాలా సమీపంలోని ఏకవీర దేవి ఆలయ దర్శనానికి వెళ్లిన ఒక కుటుంబానికి ఎదురైన చేదు అనుభవం ఆ ప్రాంతంలో తీవ్ర కలకలం రేపింది.
వీకెండ్లు, సెలవు దినాల్లో వేలాది మంది భక్తులు తరలివచ్చే ఈ పుణ్యభూమిలో.. దర్శనార్థం వచ్చిన భక్తుల పట్ల హోటల్ యజమాని, సిబ్బంది ప్రవర్తించిన తీరు ప్రజల్లో తీవ్ర ఆగ్రహావేశాలకు దారితీసింది.
దైవదర్శనం చేసుకుని ప్రశాంతంగా తిరిగి వద్దామనుకున్న ఆ కుటుంబానికి, హోటల్లో జరిగిన చిన్నపాటి వాగ్వాదం తీవ్ర హింసగా మారడం పెద్ద షాక్నిచ్చింది. ఏకవీర అమ్మవారిని దర్శించుకున్న అనంతరం ఆ కుటుంబం అక్కడ సమీపంలోని ఒక హోటల్కు భోజనం చేయడానికి వెళ్లింది.
ఆ సమయంలో ఆహార నాణ్యత, ధర లేదా సర్వీస్ విషయంలో భక్తులు హోటల్ యజమానిని ప్రశ్నించినట్లు సమాచారం. దీంతో ఆగ్రహానికి గురైన హోటల్ యజమాని, సిబ్బంది కలిసి.. “ఆగ్రీ కమ్యూనిటీ ప్రజలకు పొగరు ఎక్కువైంది” అంటూ ఒక నిర్దిష్ట సామాజిక వర్గాన్ని కించపరుస్తూ బూతులతో దూషించడం మొదలుపెట్టారు.
అంతటితో ఆగకుండా, ఆ కుటుంబ సభ్యులను అసభ్య పదజాలంతో తిడుతూ, గొడవకు దిగి వారిపై విచక్షణారహితంగా దాడి చేశారు. మహిళలు అని కూడా చూడకుండా జరిపిన ఈ దాష్టీకంపై వెంటనే పోలీస్ స్టేషన్లో ఫిర్యాదు చేశారు.
భక్తులపై జరిగిన ఈ దాడి మరియు నిర్దిష్ట వర్గాన్ని కించపరుస్తూ చేసిన వ్యాఖ్యలపై కేసు నమోదు చేసుకున్న పోలీసులు.. హోటల్ యజమానితో పాటు దాడికి పాల్పడిన వారిపై ముమ్మర దర్యాప్తు చేపట్టారు.
పవిత్రమైన ఆలయ ప్రాంగణం సమీపంలో, దర్శనానికి వచ్చే భక్తుల పట్ల హోటల్ నిర్వాహకులు ఇంతటి అరాచకానికి ఒడిగట్టడంపై సోషల్ మీడియాలోనూ, ప్రజల్లోనూ తీవ్ర వ్యతిరేకత, నిరసనలు వ్యక్తమవుతున్నాయి.