టీవీకే (TVK) అధ్యక్షుడు విజయ్ మొదటిసారిగా ఎన్డీటీవీ (NDTV) ఇంగ్లీష్ ఛానల్‌కు ఇంటర్వ్యూ ఇచ్చారు. అయితే, ఈ ఇంటర్వ్యూను వీడియో తీయడానికి ఆయన అనుమతించలేదు. దీనివల్ల విజయ్‌ను ఇంటర్వ్యూ చేసిన జర్నలిస్టులు, ఆయన చెప్పిన విషయాలను ప్రజలకు వివరించడానికి తాము విడిగా మరో ఇంటర్వ్యూ ఇవ్వాల్సి వచ్చింది. విజయ్ చేసిన ఈ పనిపై నెటిజన్లు రకరకాల ట్రోల్స్ చేస్తున్నారు.
అసలేం జరిగింది? చెన్నైలో జరిగిన ‘NDTV Tamil Nadu Summit’ కార్యక్రమానికి విజయ్‌ను ఆహ్వానించగా, ఆయన అక్కడికి రావడానికి నిరాకరించారు. బదులుగా, జర్నలిస్టులను తను ఉన్న చోటికే పిలిపించుకుని ఇంటర్వ్యూ ఇచ్చారు. ఎన్డీటీవీ ఎడిటర్ రాహుల్ కన్వాల్, వసుధా వేణుగోపాల్ ఆయనను సుమారు 45 నిమిషాల పాటు కలిశారు. కానీ వీడియో రికార్డింగ్‌కు అనుమతి లేకపోవడంతో, విజయ్ ఏం చెప్పారో వివరించడానికి ఎన్డీటీవీ ఎగ్జిక్యూటివ్ ఎడిటర్ శివ్ అరూర్ వారితో ఇంటర్వ్యూ నిర్వహించారు.
జర్నలిస్టులు చెప్పిన విజయ్ మాటలు:
- మౌనంపై స్పందన: “నేను జర్నలిస్టులను కలవట్లేదని, తక్కువగా మాట్లాడుతున్నానని కొందరు అనుకోవచ్చు. కానీ నా ప్రసంగాల ద్వారా నేను నిరంతరం ప్రజలతో మాట్లాడుతూనే ఉన్నాను. సరైన సమయంలో మీడియా ముందుకు వస్తాను.”
- రోల్ మోడల్స్: తన రాజకీయ రోల్ మోడల్స్ ఎంజీఆర్ (MGR) మరియు జయలలిత అని విజయ్ పేర్కొన్నారు.
- సినిమా కష్టాలు: ‘జననాయగన్’ సినిమా విడుదలకు అనుమతి లభించక తన నిర్మాత ఇబ్బంది పడుతున్నందుకు బాధగా ఉందని, నటుడిగా ఉండి రాజకీయాల్లోకి వస్తే ఇలాంటివి ఎదురవుతాయని తాను ముందే సిద్ధమయ్యానని చెప్పారు.
- భవిష్యత్తు: తాను కింగ్ మేకర్ కావాలని అనుకోవడం లేదని, కష్టపడి విజయం సాధిస్తానని ధీమా వ్యక్తం చేశారు. అలాగే తాను షారుఖ్ ఖాన్ అభిమానిని అని వెల్లడించారు.