తృశూర్: కేరళలోని ఎరుమపెట్టిలో ఒక అద్దె ఇంటి తవ్వకాల్లో మహిళ అస్థిపంజరం బయటపడటం స్థానికంగా తీవ్ర సంచలనం సృష్టించింది. సుమారు ఎనిమిదేళ్ల క్రితం జరిగిన హత్యగా పోలీసులు దీనిని అనుమానిస్తున్నారు.
పాత ఇంటిని పునరుద్ధరించే (renovation) క్రమంలో భాగంగా కూలీలు ఇంటి నేలను తవ్వుతుండగా ఈ అస్థిపంజరం బయటపడింది. ఒక చాపలో చుట్టి, గొయ్యి తీసి పూడ్చిపెట్టిన తర్వాత, దానిపై సిమెంట్ వేసి సీల్ చేసినట్లుగా అస్థిపంజరం లభించింది. వెంటనే యజమానులు పోలీసులకు సమాచారం అందించారు.
ఫోరెన్సిక్ నివేదిక ఏం చెబుతోంది? ఫోరెన్సిక్ నిపుణుల ప్రాథమిక విచారణలో ఆ అస్థిపంజరం సుమారు 40 ఏళ్ల మహిళకు చెందినదిగా తేలింది. అస్థిపంజరం ఎనిమిదేళ్ల పాతదని, పుర్రెపై బలమైన గాయం ఉన్నట్లు గుర్తించారు. దీనిని బట్టి ఆమెను ఎవరో తలపై కొట్టి హత్య చేసి ఉంటారని పోలీసులు భావిస్తున్నారు.
ఆరు కుటుంబాల నివాసం: అస్థిపంజరం లభించిన ఆ ఇంట్లో గత కొన్నేళ్లుగా ఆరు వేర్వేరు కుటుంబాలు అద్దెకు ఉన్నాయి. ఇందులో ఇతర రాష్ట్రాల కార్మికులతో పాటు స్థానిక కూలీలు కూడా ఉన్నారు. పోలీసులు ఇప్పటికే చాలా మంది నుండి వాంగ్మూలాలను సేకరించారు.
ముఖ్యమైన మలుపు: గతంలో ఈ ఇంట్లో నివసించిన కున్నంకుళానికి చెందిన ఒక కలప కోసే కూలీ (Woodcutter) గురించి పోలీసులు ఆరా తీశారు. అయితే అతను గతంలోనే గుండెపోటుతో మరణించినట్లు తెలిసింది. అతనికి ముగ్గురు భార్యలు ఉండేవారని సమాచారం. మరణించిన మహిళ అతని భార్యల్లో ఒకరా? లేక ఇతరులా? అనే కోణంలో పోలీసులు దర్యాప్తు చేస్తున్నారు. పాత కాలం నాటి మిస్సింగ్ కేసులను పోలీసులు మళ్లీ తిరగదోడుతున్నారు.