కర్ణాటక రాష్ట్రం ధార్వాడ్ నగరంలోని ఒక లగ్జరీ అపార్ట్మెంట్లో, 45 ఏళ్ల అనస్థీషియా నిపుణుడు (మత్తుమందుల డాక్టర్) డాక్టర్ కిరణ్ హొన్నానవర్ అత్యంత కిరాతకంగా హత్యకు గురై రక్తపు మడుగులో శవమై కనిపించారు. అదే గదిలో ఆయన 8 ఏళ్ల కుమారుడు నిహిత్ కూడా కత్తిపోటు గాయాలతో ప్రాణాల కోసం కొట్టుమిట్టాడుతున్న స్థితిలో రక్షించబడటం మొత్తం వైద్య ప్రపంచాన్ని కుదిపేసింది.
హత్యకు గురైన డాక్టర్ కిరణ్ భార్య డాక్టర్ ప్రియాంక కటనహళ్లి కూడా ఒక కంటి వైద్య నిపుణురాలు (ఆప్తాల్మాలజిస్ట్). ఘటన జరిగిన రోజున బంధువులు, స్నేహితులు కిరణ్ మొబైల్ ఫోన్కు కాల్ చేసినప్పుడు.. దాన్ని ఎత్తిన ప్రియాంక, “ఆయన విశ్రాంతి తీసుకుంటున్నారు లేదా డ్యూటీకి వెళ్లారు” అని పొంతన లేకుండా సమాధానం ఇచ్చింది. దీనితో అనుమానం వచ్చిన బంధువులు వెంటనే పోలీస్ స్టేషన్కు సమాచారం అందించారు.
సమాచారం అందుకుని ఘటనా స్థలానికి చేరుకున్న పోలీసులు, ఇంటి తలుపులు బద్దలు కొట్టి లోపలికి ప్రవేశించారు. అప్పుడు అక్కడ ఒక గదిలో డాక్టర్ కిరణ్ రక్తపు మడుగులో శవమై పడి ఉన్నారు. ఆయన 8 ఏళ్ల కుమారుడు నిహిత్ ఒంటి నిండా కత్తిపోటు గాయాలతో, మరణం అంచున ఊపిరి తీసుకోలేక తల్లడిల్లుతున్నాడు. పోలీసులు వెంటనే ఆ బాలుడిని రక్షించి సమీపంలోని ప్రైవేట్ ఆసుపత్రికి తరలించారు.
ఈ ఘోర దృశ్యం మధ్య, పోలీసులు లోపలికి వచ్చి తీసిన వీడియోలో ఒక షాకింగ్ సీన్ రికార్డయింది. భర్త రక్తపు మడుగులో శవమై పడి ఉన్నా, కొడుకు ప్రాణాల కోసం కొట్టుమిట్టాడుతున్నా.. ఆ గదిలోనే డాక్టర్ ప్రియాంక దేని గురించీ పట్టించుకోకుండా, చాలా క్యాజువల్గా మంచంపై పడుకుని మొబైల్ ఫోన్ వాడుతూ కూర్చుంది. ఈ వీడియో ప్రస్తుతం సోషల్ మీడియాలో విడుదలై నెటిజన్లను దిగ్భ్రాంతికి గురి చేస్తోంది.
పోలీసుల ప్రాథమిక విచారణలో, ఘటన జరిగిన రోజున ఇంట్లోకి బయటి వ్యక్తులు ఎవరూ అక్రమంగా ప్రవేశించినట్లు ఎలాంటి ఆధారాలు లభించలేదు. ఆ సమయంలో ఇంట్లో భార్యాభర్తలు, వారి కుమారుడు మాత్రమే ఉన్నారు. దీనితో డాక్టర్ ప్రియాంకపైనే పోలీసులకు బలమైన అనుమానాలు వ్యక్తమవుతున్నాయి. ఈ నేపథ్యంలో ఆమెను పోలీసులు అరెస్ట్ చేసి, ప్రత్యేక గదిలో ఉంచి ముమ్మరంగా విచారిస్తున్నారు.
గోడల నిండా రక్తం చిమ్మిన ఈ దారుణ హత్య ఎప్పుడు జరిగింది, దీని వెనుక ఉన్న అసలు కారణాలు మరియు కుటుంబ కలహాలు ఏంటనే విషయాలపై క్లూస్ టీమ్, ఫోరెన్సిక్ నిపుణుల సహాయంతో పోలీసులు తీవ్రంగా దర్యాప్తు చేస్తున్నారు. ఒక మహిళా డాక్టరే తన భర్తను చంపి, కన్న కొడుకును కూడా చంపడానికి ప్రయత్నించిందనే ఈ సంచలన వార్త ప్రస్తుతం ఇంటర్నెట్లో దావానలంలా వ్యాపిస్తోంది.