ఆఫీస్ నాలుగు గోడల మధ్య కంప్యూటర్ స్క్రీన్ల ముందు గడిపే యాంత్రిక జీవనానికి స్వస్తి పలికి, కేవలం 29 ఏళ్ల వయసులోనే ఉద్యోగానికి రిటైర్మెంట్ ప్రకటించిన స్నేహ రాజ్గురు ప్రయాణం ప్రస్తుతం సోషల్ మీడియాలో విపరీతంగా ట్రెండ్ అవుతోంది.
పుణెకు చెందిన ఈమె.. కార్పొరేట్ రంగంలోని విపరీతమైన పని ఒత్తిడి, పోటీతో కూడిన ఉరుకుల పరుగుల జీవితం నుంచి శాశ్వతంగా వైదొలిగారు. నగర జీవితపు విలాసాలను వదిలి, ప్రకృతి ఒడిలో ప్రశాంతమైన వ్యవసాయ జీవనాన్ని ఎంచుకున్న ఆమె నిర్ణయం.. మనశ్శాంతిని కోరుకునే ఎందరో నేటి యువతకు సరికొత్త స్ఫూర్తిని, ఆలోచనను కలిగిస్తోంది.
తన ఇన్స్టాగ్రామ్ పేజీలో ‘బాప్-బేటీ ఫామ్’ (BaapBeti Farm) పేరుతో తన వ్యవసాయ క్షేత్ర జీవనశైలికి సంబంధించిన వీడియోను పంచుకుంటూ నాలుగు కీలక సూచనలను వివరించారు. మొదటిది, చిన్న స్థలాన్ని కొనుగోలు చేసి దానికి ఒక ప్రత్యేక గుర్తింపును ఏర్పరచుకోవడం. రెండవది, ఎక్కువ నిర్వహణ అవసరం లేకుండా ఏళ్ల తరబడి దిగుబడినిచ్చే పండ్ల చెట్లను నాటడం. మూడవది, మనకు అవసరమైన ఆహారాన్ని మనమే పండించుకుంటూ స్వయం సమృద్ధి సాధించడం. చివరగా, మానసిక ప్రశాంతత కోసం ఆ స్థలం చుట్టూ రంగురంగుల పూల మొక్కలను పెంచుతూ నిత్యం ప్రకృతి అందాలను ఆస్వాదించాలని ఆమె సూచించారు.
“రిటైర్మెంట్ అనేది మీ వయసుపై ఆధారపడి ఉండదు; జీవితంలోని తీవ్రమైన ఒత్తిళ్ల కంటే మనశ్శాంతిని ఎంచుకోవడమే నిజమైన రిటైర్మెంట్” అన్న స్నేహ వ్యాఖ్యలు నెటిజన్లను ఎంతగానో ఆకట్టుకుంటున్నాయి. ఆధునిక కాలంలో డబ్బు, హోదాలను మాత్రమే విజయానికి కొలమానంగా చూసే ధోరణి నడుమ.. స్వచ్ఛమైన ఆహారం, ప్రకృతితో మమేకమైన ప్రశాంత వాతావరణమే నిజమైన సంపద అని ఆమె జీవన విధానం నిరూపిస్తోంది. విపరీతమైన పని ఒత్తిడితో సతమతమవుతున్న వేలాది మంది కార్పొరేట్ ఉద్యోగులకు ఈ ఆలోచన ఒక సరికొత్త మార్గాన్ని చూపుతోంది.
Leave a Reply