ఇజ్రాయెల్-ఇరాన్ యుద్ధం: మధ్యప్రాచ్యం (మిడిల్ ఈస్ట్) మరోసారి నిప్పుల కొలిమిలా మారింది. శనివారం ఇరాన్‌పై ఇజ్రాయెల్ మరియు అమెరికా దాడులు చేసిన తర్వాత, ఆ దేశ అత్యున్నత నాయకుడు అయతొల్లా అలీ ఖమేనీ తన రౌద్ర రూపాన్ని ప్రపంచానికి చూపించడం ప్రారంభించారు.
తమపై జరిగిన దాడులకు ప్రతీకారంగా ఇరాన్ ఏకకాలంలో ఏడు దేశాలపై దాడులు చేసింది. ఇరాన్ తన ప్రతిదాడిలో ఇజ్రాయెల్‌తో పాటు సౌదీ అరేబియా, యూఏఈ (UAE), ఖతార్, కువైట్ మరియు బహ్రెయిన్‌లను లక్ష్యంగా చేసుకుంది. ‘టైమ్స్ ఆఫ్ ఇజ్రాయెల్’ కథనం ప్రకారం.. బహ్రెయిన్‌లోని అమెరికా ఎయిర్‌బేస్‌పై దాడి హెచ్చరికలు జారీ చేస్తూ ఎయిర్ రైడ్ సైరన్‌లను మోగించారు. బహ్రెయిన్ రాజధాని మనామాలో భారీ పేలుడు శబ్దాలు వినిపించాయని, ఆకాశంలో పొగలు కమ్ముకున్నాయని అరబిక్ మీడియా నివేదించింది.
బహ్రెయిన్‌లోని ‘నెవల్ సపోర్ట్ యాక్టివిటీ’ (NSA) వద్ద ఉన్న యూఎస్ నేవీ 5వ ఫ్లీట్ హెడ్ క్వార్టర్స్‌పై ఇరాన్ దాడి చేసింది. ఇరాన్ ప్రయోగించిన బాలిస్టిక్ మిస్సైల్ యూఎస్ నేవీ ప్రధాన కార్యాలయంపై పడిన దృశ్యాలు సోషల్ మీడియాలో వైరల్ అవుతున్నాయి.
ఇరాన్ దాడి చేసిన ఆ 7 దేశాలు ఏవి? ఇరాన్ లక్ష్యంగా చేసుకున్న ఏడు దేశాలలో ఇజ్రాయెల్, ఖతార్, బహ్రెయిన్, కువైట్, సౌదీ అరేబియా, జోర్డాన్ మరియు అబుదాబి ఉన్నాయి. అక్కడ ఉన్న సామాన్య ప్రజలు ఈ దాడులను వీడియో తీసి సోషల్ మీడియాలో పోస్ట్ చేశారు. మంటలు, పొగలతో కూడిన ఆ వీడియోలు భయానకంగా ఉన్నాయి.
గగనతలం (Airspace) మూసివేత: ఇరాన్ దాడుల నేపథ్యంలో ఖతార్ మరియు యూఏఈ తమ గగనతలాన్ని మూసివేశాయి. దీనివల్ల ఖతార్ ఎయిర్‌వేస్ విమానాలు తాత్కాలికంగా నిలిపివేయబడ్డాయి. ఖతార్ మరియు యూఏఈలోని అమెరికా సైనిక స్థావరాలపై కూడా ఇరాన్ దాడులు చేయడం గమనార్హం.
ఇజ్రాయెల్‌లో ఎమర్జెన్సీ విధింపు: ఇరాన్ ప్రతిదాడి తర్వాత ఇజ్రాయెల్ దేశంలో అత్యవసర పరిస్థితిని (Emergency) ప్రకటించింది. పౌరుల భద్రతే తమ మొదటి ప్రాధాన్యతని ప్రభుత్వం పేర్కొంది. ప్రజలందరూ మార్గదర్శకాలను పాటించాలని కోరుతూ.. విద్యా సంస్థలు, బహిరంగ సభలు మరియు కార్యాలయాలను తాత్కాలికంగా మూసివేయాలని ఆదేశించింది.