టెహ్రాన్: గత ఏడాది ఇరాన్ అణుశక్తి కేంద్రాలను లక్ష్యంగా చేసుకుని అమెరికా, ఇజ్రాయెల్‌లు దాడులు చేసిన సంగతి తెలిసిందే. ఈ నేపథ్యంలో, ఇజ్రాయెల్‌తో పూర్తిస్థాయి యుద్ధానికి సిద్ధమని ఇరాన్ అధికారికంగా ప్రకటించింది. దీంతో ఇజ్రాయెల్ మీద ఎప్పుడైనా దాడి జరగొచ్చని, దీనివల్ల 3వ ప్రపంచ యుద్ధం ప్రారంభం కావచ్చనే ఆందోళనలు వ్యక్తమవుతున్నాయి.
ఇరాన్ ఏం చెప్పింది?
ఇరాన్ అత్యున్నత నాయకుడు ఖమేనీ సీనియర్ సలహాదారు యాహ్యా రహీమ్ మాట్లాడుతూ.. “మేము ఇజ్రాయెల్‌తో పోరాడటానికి సిద్ధమవుతున్నాము. ఇది చిన్నపాటి ఘర్షణ కాదు, పూర్తిస్థాయి యుద్ధం అవుతుంది. ఇతరుల వద్ద లేని ఆయుధాలు మా వద్ద ఉన్నాయి” అని వ్యాఖ్యానించారు. ఇరాన్ రివల్యూషనరీ గార్డ్స్ కమాండర్ మొహమ్మద్ బాగ్పూర్ కూడా స్పందిస్తూ.. ఇరాన్ ఏ విధమైన దాడిని ఎదుర్కోవడానికైనా సిద్ధంగా ఉందని, తాము యుద్ధానికి సంసిద్ధంగా ఉన్నామని స్పష్టం చేశారు.
కొత్త ఆయుధాల ప్రయోగం
మరోవైపు ఇరాన్ కొత్త రకం అణు ఆయుధాలను పరీక్షిస్తోంది. ముఖ్యంగా ఒకట్రెండు రోజుల క్రితం, యునైటెడ్ అరబ్ ఎమిరేట్స్ (UAE)లోని అమెరికాకు చెందిన ‘అల్ దఫ్రా’ విమానాశ్రయం నమూనాను (Model) సృష్టించి, దానిపై ఇరాన్ సైన్యం దాడి చేసింది. దీని కోసం ఖైబర్ (Khaibar) మరియు ఫతా (Fattah) వంటి క్షిపణులను ఉపయోగించింది. ఇవి భూగర్భంలోని బంకర్లను కూడా ధ్వంసం చేయగల సామర్థ్యం కలిగినవి.
హైపర్‌సోనిక్ క్షిపణులు
ఇవి హైపర్‌సోనిక్ రకానికి చెందిన క్షిపణులు. అంటే ఇవి ధ్వని వేగం కంటే 15 రెట్లు ఎక్కువ వేగంతో ప్రయాణిస్తాయి. కాబట్టి వీటిని మార్గమధ్యంలో అడ్డుకోవడం అసాధ్యం. ఇరాన్ హెచ్చరికలతో మధ్యప్రాచ్యంలో ఉద్రిక్తతలు పెరిగాయి. దీనిపై అమెరికా తీవ్ర ఆరోపణలు చేస్తోంది.
రంగంలోకి ట్రంప్
“ఐరోపా మరియు అమెరికాలను భయపెట్టే క్షిపణులను ఇరాన్ తయారు చేస్తోంది. అణు కార్యక్రమాలను నిలిపివేయాలని హెచ్చరించినప్పటికీ, ఇరాన్ తన ప్రయత్నాలను కొనసాగిస్తోంది” అని డొనాల్డ్ ట్రంప్ ఆరోపించారు. అయితే ఇరాన్ ఈ ఆరోపణలను తీవ్రంగా ఖండించింది. ట్రంప్ వ్యాఖ్యలు అవాస్తవమని, ప్రజలను తప్పుదోవ పట్టించడానికే ఇలా మాట్లాడుతున్నారని మండిపడింది.
ట్రంప్ ఆరోపణలు, ఇజ్రాయెల్ మీద ఇరాన్ యుద్ధ ప్రకటనతో మొత్తం మధ్యప్రాచ్యం అంతా భయాందోళనలో మునిగిపోయింది.