పెళ్లి కోసం సంబంధాలు చూసేటప్పుడు తమకు కాబోయే భాగస్వామి గురించి రకరకాల కోరికలు, నిబంధనలు పెట్టడం సర్వసాధారణం. ఎత్తు, జీతం, రంగు, చదువు, ఉద్యోగం వంటి సాధారణ డిమాండ్ల మధ్య.. ఒంటిపై టాటూ (పచ్చబొట్టు) ఉన్న అమ్మాయిని పెళ్లి చేసుకోనంటూ ఓ వ్యక్తి పెట్టిన వింత షరతు ఇప్పుడు సోషల్ మీడియాలో తీవ్ర చర్చనీయాంశంగా మారింది.
‘నాట్ డేటింగ్’ (Knot Dating) సహ వ్యవస్థాపకుడు, సీఈవో జస్వీర్ సింగ్ తన సోషల్ మీడియా ఖాతాలో ఈ విచిత్రమైన అనుభవాన్ని పంచుకున్నారు.
- మ్యాట్రిమోనీ సీఈవో పోస్ట్: ఒక మ్యాట్రిమోని లేదా డేటింగ్ ప్లాట్‌ఫామ్‌ను నడపడం అంటే రకరకాల విచిత్రమైన కోరికలను ఎదుర్కోవడమేనని ఆయన పేర్కొన్నారు. ఎత్తు, రంగు, సంపాదన, విద్యార్హతలు వంటి డిమాండ్లు చాలా సాధారణమని, కానీ ఇటీవల ఓ వ్యక్తి పెట్టిన డిమాండ్ తనను విస్మయానికి గురిచేసిందని తెలిపారు.
- టాటూ ఉంటే వద్దన్న వరుడు: తమ సంస్థకు చెందిన ఓ ప్రీమియం మెంబర్‌కు కొన్ని ప్రొఫైల్స్ సూచించగా, మ్యాచ్‌మేకింగ్ కన్సల్టెంట్ అతని ఫీడ్‌బ్యాక్ అడిగారు. ఆ సమయంలో ఆ వ్యక్తి.. తనకు కాబోయే భార్య శరీరంలో ఎక్కడా టాటూ ఉండకూడదని, ఆ విషయంలో తాను చాలా స్పష్టంగా ఉన్నానని తేల్చి చెప్పాడు.
- ఇదెలా అడగాలి?: ఈ విషయంపై జస్వీర్ సింగ్ స్పందిస్తూ.. “టాటూ ఉన్నవారిని ఎలా ఫిల్టర్ చేయాలో నాకే అర్థం కాలేదు. దీని కోసం యాప్‌లో కొత్తగా మరో ఫిల్టర్ పెట్టి, ప్రతి అమ్మాయిని ‘మీకు టాటూ ఉందా లేదా?’ అని అడగలేం కదా! ఎన్నో రకాల వింత కోరికలు చూశాను కానీ, ఇది నాకే పూర్తిగా కొత్త” అని వాపోయారు.
- నెటిజన్ల భిన్న స్పందనలు: ఈ పోస్ట్ వైరల్ కావడంతో నెటిజన్లు రకరకాలుగా స్పందిస్తున్నారు. ఇలాంటి వ్యక్తిగత ఇష్టాయిష్టాలను మ్యాట్రిమోనీ ఫిల్టర్లలో పెట్టడం కంటే, కాబోయే దంపతులే స్వయంగా మాట్లాడుకుని తేల్చుకోవడం మంచిదని కొందరు కామెంట్ చేశారు. ఇలాంటి ప్రతి కోరికకూ ఫిల్టర్లు పెడుతూ పోతే దానికి అంతంటూ ఉండదని మరికొందరు అభిప్రాయపడ్డారు.