కోప్పల్: ప్రస్తుత కాలంలో ఎవరిని నమ్మాలో, ఎవరిని నమ్మకూడదో అర్థం కాని పరిస్థితులు నెలకొన్నాయి. మనకు తెలిసిన వారే ద్రోహం చేసినప్పుడు ఆ భయం మరింత ఎక్కువగా ఉంటుంది. కర్ణాటకలోని కోప్పల్ జిల్లా మదళూరు గ్రామంలో 39 ఏళ్ల మహిళా హోంగార్డుకు జరిగిన దారుణ ఘటన ఈ చేదు నిజాన్ని మరోసారి రుజువు చేసింది. పరిచయస్తుడే నమ్మించి, మద్యం తాగించి, తన స్నేహితులతో కలిసి ఆమెపై సామూహిక అత్యాచారానికి పాల్పడిన ఘటన తీవ్ర కలకలం రేపింది.
అసలేం జరిగింది? కుష్తగి నగరానికి తన తెలిసిన వారిని కలవడానికి వచ్చిన మహిళను, లక్ష్మణ్ కెంఛప్ప కరుగులి అనే వ్యక్తి తన మోటార్ సైకిల్పై ఎక్కించుకుని ఒక నిర్మానుష్యమైన ఇంటికి తీసుకెళ్లాడు. బాధితురాలు పోలీసులకు తెలిపిన వివరాల ప్రకారం, నిందితుడు ఆమెకు జ్యూస్ అని నమ్మించి బలవంతంగా మద్యం తాగించాడు. మద్యం మత్తులో ఉన్న సమయంలో లక్ష్మణ్ కెంఛప్ప కరుగులితో పాటు బసవరాజ్ సాకరప్ప, భీమప్ప మాస్కి, శశికుమార్ మాస్కి అనే నలుగురు వ్యక్తులు ఆమెపై సామూహిక అత్యాచారానికి పాల్పడ్డారు.
పోలీసుల స్పందన: ఎలాగోలా తేరుకున్న బాధితురాలు పోలీసుల ‘ఎమర్జెన్సీ రెస్పాన్స్ సపోర్ట్ సిస్టమ్’ (ERSS)కి ఫోన్ చేసి సహాయం కోరింది. సమాచారం అందుకున్న పోలీసులు వెంటనే సంఘటనా స్థలానికి చేరుకుని, తీవ్ర గాయాలతో ఉన్న ఆమెను యలబుర్గాలోని ప్రభుత్వ ఆసుపత్రికి తరలించారు. పరిస్థితి విషమించడంతో ఆమెను కోప్పల్లోని KIMS ఆసుపత్రికి రిఫర్ చేశారు. ప్రస్తుతం ఆమె పరిస్థితి విషమంగా ఉందని వైద్యులు తెలిపారు.
బాధితురాలి భర్త ఆవేదన: ఆసుపత్రిలో ఉన్న తన భార్యను చూడటానికి వచ్చిన భర్త తీవ్ర ఆవేదన వ్యక్తం చేశారు. తన భార్యకు ప్రమాదం జరిగిందని తనకు సమాచారం ఇచ్చారని, కానీ ఇంతటి దారుణం జరిగిందని తెలియక షాక్కు గురయ్యానని కన్నీరుమున్నీరయ్యారు. పోలీసులు నలుగురు నిందితులను అరెస్టు చేసి కోర్టులో హాజరుపరచగా, కోర్టు వారిని జ్యుడీషియల్ కస్టడీకి పంపింది.