ఇది ప్రభుత్వ పాఠశాలా లేక సంతనా..? “టీసీ (TC) జారీ విషయంలో చెలరేగిన ఘర్షణ”.. మహిళా ఉద్యోగిపై దాడికి దిగిన విద్యార్థినీ విద్యార్థులు.. తరగతి గదిలోనే జుట్లు పట్టుకుని కొట్టుకున్న వైనం.. షాకింగ్ వీడియో..!!!

పశ్చిమ బెంగాల్‌లోని మాల్దా జిల్లా బామన్‌గోలా పరిధిలోని జగత్‌దలా ఉన్నత పాఠశాలలో చోటుచేసుకున్న ఘటన, విద్యాసంస్థల్లో చెలరేగుతున్న హింసను మరోసారి బట్టబయలు చేసింది.

పాఠశాల విద్యార్థులకు, మహిళా నాన్-టీచింగ్ ఉద్యోగికి మధ్య సర్టిఫికెట్ జారీ విషయంలో తలెత్తిన వివాదం ముదిరి ఒకరిపై ఒకరు పరస్పరం దాడులు చేసుకునే స్థాయికి చేరడం తీవ్ర కలకలం రేపింది.

ఆ పాఠశాలలో గత ఏడాదిన్నరగా పనిచేస్తున్న ఒక మహిళా అడ్మినిస్ట్రేటివ్ ఉద్యోగి వద్దకు వచ్చిన ఒక పాత విద్యార్థి, తన పేరులోని అక్షర దోషాన్ని సరిదిద్ది కొత్త బదిలీ ధ్రువీకరణ పత్రం (టీసీ – Transfer Certificate) ఇవ్వాలని కోరాడు. అయితే అధికారిక పాఠశాల రికార్డుల ప్రకారం మాత్రమే పత్రాలు ఇవ్వడానికి వీలవుతుందని చెబుతూ ఆ ఉద్యోగి కొత్త టీసీ ఇచ్చేందుకు నిరాకరించారు.

దీంతో తీవ్ర ఆగ్రహానికి లోనైన కొందరు విద్యార్థులు ఉన్నట్టుండి స్టాఫ్ రూమ్‌లోకి చొరబడి ఆ మహిళా ఉద్యోగిపై భౌతిక దాడికి పాల్పడ్డారు. ఈ దాడికి పాఠశాల ఇన్‌చార్జ్ ప్రధానోపాధ్యాయుడు (హెడ్‌మాస్టర్) అమిత్ హాల్డర్‌తో పాటు మరో ఉపాధ్యాయుడు కూడా సహకరించారని బాధిత మహిళ ఆరోపించారు. తీవ్రంగా గాయపడిన ఆమెను వెంటనే స్థానిక ఆసుపత్రికి తరలించగా, ఈ ఘటనపై పోలీస్ స్టేషన్‌లోనూ ఫిర్యాదు నమోదైంది.

మహిళా ఉద్యోగిపై జరిగిన దాడికి ప్రతిస్పందనగా ఆమె బంధువులు, మద్దతుదారులు భారీగా ఆసుపత్రి వద్దకు చేరుకున్నారు. అక్కడ చికిత్స పొందుతున్న ఇన్‌చార్జ్ హెడ్‌మాస్టర్ మరియు మరో ఉపాధ్యాయుడిపై వారు కూడా ఎదురుదాడికి దిగినట్లు సమాచారం. దీంతో ఆసుపత్రి ప్రాంగణంలో తీవ్ర ఉద్రిక్తత నెలకొంది. అనంతరం మెరుగైన చికిత్స కోసం గాయపడిన మహిళా ఉద్యోగిని జిల్లా స్థాయి పెద్ద ఆసుపత్రికి తరలించారు. దాడికి పాల్పడిన పలువురు ఉపాధ్యాయులపై ఆమె పోలీసులకు అదనపు ఫిర్యాదులు కూడా అందజేశారు.