“ఇది మీ ఇల్లు కాదు మేడమ్, పబ్లిక్ ప్లేస్!”: రైల్లో తోటి ప్రయాణికులకు తీవ్ర అసౌకర్యం.. మహిళల పాటల కచేరీని కూల్‌గా ఆపేయించిన రైల్వే అధికారి.!!

రైలు ప్రయాణంలో కొందరు మహిళలు గుంపుగా చేరి పాటలు పాడుతూ, చప్పట్లు కొడుతూ ‘మహిళా సంగీత్’ తరహాలో వేడుక చేసుకుంటున్న వీడియో ఒకటి సోషల్ మీడియాలో విపరీతంగా వైరల్ అవుతోంది.

రైలులో ప్రయాణిస్తున్న ఆ మహిళలు తమ ప్రయాణాన్ని ఎంజాయ్ చేయాలనే ఉద్దేశంతో.. అది పబ్లిక్ ప్లేస్ అనే విషయాన్ని మర్చిపోయి, తోటి ప్రయాణికుల ఇబ్బందులను పట్టించుకోకుండా ఇలాంటి సంబరాలకు దిగారు. ఈ ఘటనకు సంబంధించిన వీడియో నెట్టింట హాట్ టాపిక్‌గా మారింది.

ఆ మహిళల నిరంతర పాటలు, అరుపులు, కేకల వల్ల ఆ రైలు బోగీలోని ఇతర ప్రయాణికులకు తీవ్ర అసౌకర్యం కలిగింది. దీనిని గమనించిన టిక్కెట్ చెకింగ్ అధికారి (TTE) అక్కడికి వచ్చి, ఎంతో శాంతంగా ఆ మహిళలకు పరిస్థితిని వివరించారు. రైలు అనేది అందరూ కలిసి ప్రయాణించే ఒక పబ్లిక్ ప్రదేశమని, ఇతర ప్రయాణికుల ప్రయాణానికి ఎలాంటి భంగం కలగకుండా ప్రశాంతతను పాటించాలని ఆ మహిళలకు హితవు పలికి వారి పాటల కచేరీని ఆపించారు.

ఈ సంఘటనకు సంబంధించిన వీడియో ‘ఎక్స్’ (ట్విట్టర్) సహా పలు సోషల్ మీడియా ప్లాట్‌ఫామ్‌లలో విడుదలై నెటిజన్ల మధ్య తీవ్ర చర్చకు దారితీసింది. పబ్లిక్ ప్లేసుల్లో ఎలా ప్రవర్తించాలనే కనీస పౌర స్పృహ (Civic Sense) చాలామందికి ఉండటం లేదంటూ పలువురు ఆ మహిళల ప్రవర్తనను తప్పుబడుతున్నారు. అదే సమయంలో, ఎలాంటి వాగ్వాదానికి తావు లేకుండా ఎంతో సహనంతో, హుందాగా పరిస్థితిని చక్కదిద్దిన సదరు రైల్వే అధికారి సమయస్ఫూర్తిని నెటిజన్లు ప్రశంసిస్తున్నారు.