వాషింగ్టన్: ఇరాన్‌పై ఇజ్రాయెల్ మరియు అమెరికా ఉమ్మడిగా దాడులు ప్రారంభించిన నేపథ్యంలో మధ్యప్రాచ్యంలో తీవ్ర ఉద్రిక్తత నెలకొంది.
ఇరాన్ కూడా ప్రతీకార దాడులను ప్రారంభించడంతో దుబాయ్ సహా గల్ఫ్ ప్రాంతంలోని పలు ప్రాంతాల్లో హై అలర్ట్ ప్రకటించారు. ఈ ఉద్రిక్త పరిస్థితుల్లో ఇరాన్‌కు మద్దతుగా ఎవరు నిలుస్తున్నారు? అమెరికా, ఇజ్రాయెల్ పక్షాన ఉన్న దేశాలు ఏవో ఇప్పుడు చూద్దాం.
ఇరాన్‌పై ఇజ్రాయెల్ దాడులు
అమెరికా మరియు ఇజ్రాయెల్ కలిసి ఇరాన్‌పై భారీ దాడులకు దిగాయి. ఇది గత కొన్ని నెలలుగా పక్కాగా ప్లాన్ చేసిన ఉమ్మడి చర్య అని ఇరు దేశాలు పేర్కొన్నాయి. ఇరాన్ సుప్రీం లీడర్ అయతొల్లా అలీ ఖమేనీని లక్ష్యంగా చేసుకుని ఇజ్రాయెల్ దాడులు ప్రారంభించింది. ఆయనతో పాటు ఇరాన్ అధ్యక్షుడు మసూద్ పెజెస్కియాన్ మరియు సాయుధ దళాల అధిపతులపై కూడా దాడులు జరుగుతున్నట్లు సమాచారం.
అమెరికా, ఇజ్రాయెల్ క్షిపణులతో విరుచుకుపడుతుండటంతో ఇరాన్ ఎదురుదాడి ప్రారంభించింది. గల్ఫ్ ప్రాంతంలోని అమెరికా, ఇజ్రాయెల్ సైనిక స్థావరాలపై ఇరాన్ దాడులు చేస్తోంది. ఇజ్రాయెల్, బహ్రెయిన్, అబుదాబి, దుబాయ్, కువైట్, రియాద్ మరియు ఖతార్‌లోని కొన్ని ప్రాంతాల్లో పేలుడు శబ్దాలు వినిపిస్తున్నట్లు వార్తలు వస్తున్నాయి.
ఏ దేశం ఎవరి పక్షాన?
- ఇరాన్ మద్దతుదారులు: లెబనాన్‌లోని హిజ్బుల్లా, ఇరాక్‌లోని పాపులర్ మొబిలైజేషన్ ఫోర్సెస్ (PMF), యెమెన్‌లోని హౌతీ రెబల్స్, గాజాలోని హమాస్ ఇరాన్‌కు అండగా ఉన్నాయి. రష్యా, చైనాలు కూడా ఇరాన్‌తో సైనిక సహకారాన్ని పెంచుకున్నాయి. అమెరికా దాడులను రష్యా ఖండించింది. పాకిస్థాన్ కూడా ఇరాన్‌కు మద్దతుగా ఉన్నట్లు సమాచారం.
- అమెరికా – ఇజ్రాయెల్ మద్దతుదారులు: గల్ఫ్ దేశాలైన యూఏఈ (UAE), ఖతార్, కువైట్ ఇరాన్ దాడులను తిప్పికొడతామని హెచ్చరించాయి. ఇరాన్ ప్రయోగించిన బాలిస్టిక్ క్షిపణులను తమ వైమానిక రక్షణ వ్యవస్థ అడ్డుకుందని యూఏఈ తెలిపింది. జర్మనీ, ఫ్రాన్స్ వంటి పాశ్చాత్య దేశాలు కూడా ఇరాన్‌ను ఖండించాయి.
ఇటలీ, ఫ్రాన్స్ వైఖరి
అమెరికా-ఇజ్రాయెల్ దాడుల్లో ఫ్రాన్స్ దళాలు కూడా ఉన్నాయా అన్న ప్రశ్నకు ఆ దేశం అస్పష్టంగా సమాధానమిచ్చింది. ఉద్రిక్తతలను తగ్గించేందుకు కూటమి దేశాల నాయకులతో త్వరలో చర్చిస్తామని ఇటలీ పేర్కొంది.