వాషింగ్టన్/టెహ్రాన్: పశ్చిమాసియాలో యుద్ధం ఊహించని మలుపు తిరిగింది. ఇరాన్ వెన్నెముకను విరిచేలా అమెరికా అధ్యక్షుడు డొనాల్డ్ ట్రంప్ అత్యంత సాహసోపేతమైన నిర్ణయం తీసుకున్నారు. ఇరాన్ ఆర్థిక వ్యవస్థకు గుండెకాయ వంటి ‘ఖర్గ్ ఐలాండ్’ (Kharg Island)పై అమెరికా సేనలు నిప్పులు కురిపించాయి. ఈ మెరుపు దాడితో పర్షియన్ గల్ఫ్ ప్రాంతం ఒక్కసారిగా దద్దరిల్లిపోయింది.
ట్రంప్ హెచ్చరిక: “ఇది కేవలం ఆరంభం మాత్రమే!”
దాడి జరిగిన వెంటనే ట్రంప్ తన ‘ట్రూత్ సోషల్‌’ వేదికగా గర్జించారు. “నా ఆదేశాల మేరకు యూఎస్ సెంట్రల్ కమాండ్ ఖర్గ్ ఐలాండ్‌లోని సైనిక స్థావరాలను పూర్తిగా తుడిచిపెట్టేసింది. పశ్చిమాసియా చరిత్రలోనే ఇది అత్యంత శక్తిమంతమైన దాడి,” అని ప్రకటించారు. అయితే, ప్రస్తుతానికి చమురు నిల్వలను టార్గెట్ చేయలేదని, కానీ ఒకవేళ హర్మూజ్ జలసంధి వద్ద రవాణాను అడ్డుకుంటే మాత్రం ఇరాన్ ‘ఆర్థిక కిరీటాన్ని’ కూల్చేస్తానని స్ట్రాంగ్ వార్నింగ్ ఇచ్చారు.
ఖర్గ్ ఐలాండ్ ఎందుకు అంత ముఖ్యం?
ఇరాన్ పాలిట ఈ ద్వీపం ఒక ‘బంగారు బాతు’. ఆ దేశం చేసే మొత్తం చమురు ఎగుమతుల్లో 90 శాతం ఇక్కడి నుంచే జరుగుతాయి.
ఆర్థిక మూలం: ఇరాన్ ఖజానా నిండాలంటే ఖర్గ్ ఐలాండ్ క్షేమంగా ఉండాలి.
వ్యూహాత్మక హబ్: గడిచిన కొద్ది కాలంలోనే దాదాపు 13.7 మిలియన్ బ్యారెళ్ల చమురు ఇక్కడి నుంచే విదేశాలకు తరలింది.
ఇప్పుడు అమెరికా నేరుగా ఈ ద్వీపంపై దాడి చేయడంతో ఇరాన్ పీకల్లోతు కష్టాల్లో పడినట్లయింది.
మంటల్లో చమురు ధరలు.. కలవరంలో ప్రపంచ దేశాలు
ఈ దాడుల వార్త బయటకు రాగానే అంతర్జాతీయ మార్కెట్లో ముడిచమురు ధరలు ఒక్కసారిగా భగ్గుమన్నాయి. సరఫరా వ్యవస్థ దెబ్బతింటే ప్రపంచవ్యాప్తంగా ఇంధన సంక్షోభం తలెత్తే ప్రమాదం ఉందని నిపుణులు ఆందోళన వ్యక్తం చేస్తున్నారు. తన అణ్వాయుధ కలలను వదులుకోకపోతే ఇరాన్‌కు మిగిలిన ప్రాంతాలు కూడా దక్కవని ట్రంప్ చేసిన హెచ్చరికలు చూస్తుంటే, యుద్ధం ఇక క్లైమాక్స్ దశకు చేరుకుందనిపిస్తోంది.