“బంగారం ధర ఎప్పుడు పెరుగుతుంది? ఎప్పుడు తగ్గుతుంది?” – గత కొన్నేళ్లుగా సామాన్యుడిని వేధిస్తున్న ప్రశ్న ఇది. అక్షయ తృతీయ సందర్భంగా ప్రజలందరూ బంగారం కొనడానికి ఆసక్తి చూపుతున్న వేళ, ఒక నిర్దిష్ట రకమైన బంగారం జోలికి వెళ్లవద్దని ఆర్థిక నిపుణుడు ఆనంద్ శ్రీనివాసన్ హెచ్చరిస్తున్నారు. అది మీ దగ్గర ఉన్నా సరే వెంటనే అమ్మేసి బయటపడటమే మంచిదని ఆయన సూచిస్తున్నారు.
గోల్డ్ బీస్ (Gold BeES) అంటే ఏమిటి?
బంగారం ధరలు ఆకాశాన్ని తాకడంతో చాలామంది తక్కువ మొత్తంలో డిజిటల్ రూపంలో పెట్టుబడి పెట్టడానికి ‘గోల్డ్ బీస్’ లేదా ‘గోల్డ్ ఇటిఎఫ్’ (Gold ETF) మార్గాన్ని ఎంచుకుంటున్నారు. ఇందులో మనం స్టాక్ మార్కెట్ ద్వారా డిజిటల్ పద్ధతిలో బంగారాన్ని కొనుగోలు చేస్తాం.
మారుతున్న నిబంధనలు – పెరుగుతున్న ముప్పు:
ఇప్పటివరకు ఉన్న నిబంధనల ప్రకారం.. ఒక సంస్థ రూ. 100 విలువైన గోల్డ్ బీస్ను విక్రయిస్తే, ఆ సంస్థ వద్ద దానికి సమానమైన బంగారాన్ని ఫిజికల్గా లాకర్లో ఉంచాలి. అయితే, ఈ నిబంధనలో పెద్ద మార్పు వచ్చిందని ఆనంద్ శ్రీనివాసన్ పేర్కొన్నారు.
ఆయన తన వీడియోలో ఇలా వివరించారు: “ప్రస్తుతం బంగారం ధరలు గరిష్ట స్థాయికి చేరాయి. దిగుమతి చేసుకోవడానికి భారత్ వద్ద డాలర్ల కొరత కూడా ఉంది. ఈ నేపథ్యంలో, 50% మాత్రమే భౌతిక బంగారం (Physical Gold) ఉంచి, మిగిలిన 50 శాతాన్ని ‘ఫ్యూచర్స్ మార్కెట్’ (Futures Market)లో ఉంచుకోవడానికి రిజర్వ్ బ్యాంక్ అనుమతి ఇచ్చింది. ఇది చాలా ప్రమాదకరమైన ధోరణి. బంగారం లేకుండానే ఉన్నట్లు చూపించే ఈ పద్ధతి ఒక రకమైన జూదం లాంటిది.”
అమ్మేయడమే ఉత్తమం:
గోల్డ్ బీస్ విక్రయిస్తే లాభాలపై పన్ను (Capital Gains Tax) కట్టాల్సి వస్తుందని చాలామంది ఆందోళన చెందుతుంటారు. దీనిపై ఆయన స్పందిస్తూ.. “పన్ను అనేది మీ లాభంలో ఒక భాగం మాత్రమే. కానీ ఒక సంస్థ మీ డబ్బుతో సరిగ్గా ‘హెడ్జింగ్’ చేయక నష్టపోతే మీ అసలు పెట్టుబడికే మోసం వస్తుంది. పన్ను కట్టాల్సి వచ్చినా పర్వాలేదు, గోల్డ్ బీస్ను అమ్మేసి ఆ డబ్బుతో నేరుగా ఫిజికల్ బంగారాన్ని కొని లాకర్లో పెట్టుకోవడమే తెలివైన పని” అని సలహా ఇచ్చారు.
పన్ను వివరణ:
ఏప్రిల్ 1, 2023 తర్వాత కొనుగోలు చేసిన గోల్డ్ బీస్ లాభాలను మీ సాధారణ ఆదాయంగానే పరిగణిస్తారు. ఒకవేళ మీ వార్షిక ఆదాయం (గోల్డ్ బీస్ లాభాలతో కలిపి) రూ. 12 లక్షల లోపు ఉంటే, మీరు ఎటువంటి పన్ను చెల్లించాల్సిన అవసరం ఉండదు. ఇది మీ జీతం లేదా వ్యాపార ఆదాయంలాగే మీ ‘మొత్తం ఆదాయం’లో చేర్చబడుతుంది.