ఎక్కువ శాతం గుండెపోటు (హార్ట్ ఎటాక్) ఘటనలు తెల్లవారుజాము లేదా ఉదయం వేళల్లోనే జరుగుతాయని వైద్య నిపుణులు హెచ్చరిస్తున్నారు.
ముఖ్యంగా ఉదయం 6 గంటల నుండి 8 గంటల మధ్యలో, నిద్రలేచిన మొదటి 10 నిమిషాలు గుండె ఆరోగ్యానికి అత్యంత కీలకమైన సమయం. నిద్రలేచే సమయంలో శరీరంలో జరిగే మార్పులు, వాటి నుంచి గుండెను ఎలా కాపాడుకోవాలనే విషయాలను 28 ఏళ్ల అనుభవం ఉన్న ప్రముఖ కార్డియాలజిస్ట్ వివరించారు.
రాత్రి నిద్రించే సమయంలో శరీరంలో నీటి శాతం తగ్గడం (డీహైడ్రేషన్) వల్ల ఉదయాన్నే రక్తం చిక్కబడుతుంది. అదే సమయంలో నిద్ర నుండి శరీరం మేల్కొనే క్రమంలో ‘కార్టిసాల్’ (Cortisol) అనే హార్మోన్ విడుదల పెరిగి, రక్తపోటు (బీపీ) ఒక్కసారిగా పెరుగుతుంది. దీనివల్ల రక్తనాళాలు కుంచించుకుపోయి, రక్తం గడ్డకట్టే (బ్లడ్ క్లాట్) ప్రమాదం ఉదయపు వేళల్లో గణనీయంగా పెరుగుతుంది.
ఉదయాన్నే అలారం మోగగానే కంగారుగా మంచం మీద నుంచి లేచి పనులు మొదలుపెట్టడం, ఖాళీ కడుపుతో కాఫీ తాగడం లేదా చన్నీటి స్నానం చేయడం వంటివి గుండె వేగాన్ని మొదటి 60 సెకన్లలోనే వేగంగా పెంచి, గుండెపై అనవసరమైన ఒత్తిడిని కలిగిస్తాయి. తెలియకుండా చేసే ఇలాంటి తప్పులే చాలామందిని ఉదయపు గుండెపోటు ప్రమాదంలోకి నెట్టివేస్తున్నాయి.
గుండెను రక్షించుకోవడానికి నిద్రలేవగానే చేయాల్సిన మొదటి పని ఒక గ్లాసు నీళ్లు తాగడం. ఇది చిక్కబడిన రక్తాన్ని పలచబరిచి, రక్తం గడ్డకట్టే ప్రమాదాన్ని తగ్గిస్తుంది. రెండవది, మంచం మీద నుండి హడావుడిగా లేవకుండా 2 నిమిషాలు మంచం అంచున కూర్చుని శరీరాన్ని సాధారణ స్థితికి తీసుకురావాలి. ఇది గుండెపై అకస్మాత్తుగా పడే ఒత్తిడిని నివారిస్తుంది.
మూడవది, పరగడుపున కాఫీ తాగే అలవాటును పూర్తిగా మానుకోవాలి. ఒకవేళ కాఫీ తాగాలనిపిస్తే, అరటిపండు లేదా ఏదైనా తేలికపాటి ఆహారం తీసుకున్న తర్వాతే తాగాలి. ఈ మూడు సాధారణ అలవాట్లను పాటించడం ద్వారా తెల్లవారుజామున వచ్చే గుండెపోటు ముప్పు నుంచి గుండెను కాపాడుకోవచ్చు.