ఉత్తరప్రదేశ్‌లోని గ్రేటర్ నోయిడాలో ఉన్న ఒక ప్రైవేట్ డయాగ్నోస్టిక్ సెంటర్‌లో ఎంఆర్‌ఐ స్కానింగ్ జరుగుతుండగా ఆరేళ్ల బాలుడు మరణించాడు. దంకౌర్‌లోని రీల్ఖా నివాసి అయిన ప్రశాంత్ కసానా కుమారుడు ఈ ఘటనలో ప్రాణాలు కోల్పోయాడు. సెక్టార్ P3లోని ‘కెబి హెల్త్‌కేర్ సెంటర్’లో ఈ విషాదం చోటుచేసుకుంది.
కుటుంబ సభ్యుల ఆరోపణలు: క్లినిక్ నిర్లక్ష్యం వల్లే తమ బిడ్డ చనిపోయాడని కుటుంబ సభ్యులు ఆరోపిస్తున్నారు. బాలుడి తండ్రి ప్రశాంత్ కసానా తెలిపిన వివరాల ప్రకారం.. ఎంఆర్‌ఐ స్కానింగ్‌కు ముందు బాలుడికి ఒక ఇంజెక్షన్ ఇచ్చారు. ఆ తర్వాత స్కానింగ్ జరుగుతుండగా బాలుడి ఆరోగ్యం క్షీణించింది.
కాసేపటికే బాలుడు స్పృహ కోల్పోయాడు. స్కానింగ్‌కు ముందు తప్పుడు మందు లేదా మోతాదుకు మించి ఇంజెక్షన్ ఇవ్వడం వల్లే బాలుడు మరణించాడని కుటుంబం ఆరోపిస్తోంది. బాలుడి పరిస్థితి గురించి, మెడికల్ రిపోర్టుల గురించి అడిగినప్పుడు క్లినిక్ సిబ్బంది సరైన సమాధానం ఇవ్వలేదని వారు వాపోయారు.
బాలుడి పరిస్థితి విషమించడంతో వెంటనే సమీపంలోని మరొక ప్రైవేట్ ఆసుపత్రికి తరలించారు, కానీ అప్పటికే బాలుడు మరణించినట్లు వైద్యులు ధృవీకరించారు.
నిరసనలు మరియు పోలీసుల చర్య: ఈ ఘటనపై భారతీయ కిసాన్ యూనియన్ ఆధ్వర్యంలో గ్రామస్థులు క్లినిక్ ముందు భారీ నిరసన చేపట్టారు. బాలుడిని క్లినిక్‌కు తీసుకువచ్చినప్పుడు ఆరోగ్యం నిలకడగానే ఉందని, అతనికి ఇచ్చిన మందుల వివరాలను డాక్టర్లు వెల్లడించడం లేదని కిసాన్ యూనియన్ ప్రతినిధి పవన్ ఖతానా ఆరోపించారు. గ్రేటర్ నోయిడాలో ఇలాంటి అనధికారిక స్కానింగ్ సెంటర్లు అనేకం ఉన్నాయని, వాటిపై సమగ్ర విచారణ జరపాలని ఆయన డిమాండ్ చేశారు.
సమాచారం అందుకున్న పోలీసులు అక్కడికి చేరుకుని నిరసనకారులను శాంతింపజేశారు. బాలుడి మృతదేహాన్ని పోస్ట్‌మార్టం నిమిత్తం తరలించారు. ఈ ఘటనపై కేసు నమోదు చేసి విచారణ జరుపుతున్నామని పోలీసులు తెలిపారు.