రష్యా-ఉక్రెయిన్ మధ్య దీర్ఘకాలంగా సాగుతున్న భీకర యుద్ధం కారణంగా అంతర్జాతీయ మార్కెట్‌లో ఇంధన కొరత తీవ్రరూపం దాలుస్తోంది.
ముఖ్యంగా, రష్యాకు చెందిన ప్రధాన ఇంధన శుద్ధి కర్మాగారాలు, డీజిల్ ఉత్పత్తి కేంద్రాలను లక్ష్యంగా చేసుకుని ఉక్రెయిన్ సైన్యం వరుసగా వైమానిక దాడులకు పాల్పడుతోంది. ఈ పరిణామం ప్రపంచ దేశాల్లో తీవ్ర ఆందోళన కలిగిస్తున్న నేపథ్యంలో.. అమెరికా అధ్యక్షుడు డొనాల్డ్ ట్రంప్ ఉక్రెయిన్‌కు నేరుగా తీవ్ర హెచ్చరికలు జారీ చేశారు.
రష్యా డీజిల్ శుద్ధి కర్మాగారాలపై సాగిస్తున్న దాడులను తక్షణమే విరమించుకోవాలని ట్రంప్ ఉక్రెయిన్‌కు స్పష్టం చేశారు. ప్రస్తుతం ప్రపంచవ్యాప్తంగా నెలకొన్న తీవ్రమైన డీజిల్ కొరతకు పశ్చిమాసియా (మిడిల్ ఈస్ట్) దేశాల్లో నెలకొన్న యుద్ధ వాతావరణం గానీ, ఉద్రిక్తతలు గానీ ఎంతమాత్రం కారణం కాదని ఆయన ఎత్తిచూపారు. మాస్కో-కీవ్ మధ్య సుదీర్ఘకాలంగా సాగుతున్న ఈ ప్రత్యక్ష యుద్ధమే ప్రపంచవ్యాప్త ఇంధన కొరతకు పూర్తి బాధ్యత వహించాలని ఆయన బహిరంగంగా తేల్చిచెప్పారు.
అమెరికా అధ్యక్షుడి ఈ వ్యాఖ్యలు అంతర్జాతీయ రాజకీయ యవనికపై తీవ్ర సంచలనం రేకెత్తించడంతో పాటు, ఉక్రెయిన్ పట్ల అమెరికా దౌత్య వైఖరిలో వచ్చిన మార్పును స్పష్టంగా సూచిస్తున్నాయి. యుద్ధభూమిలో ఉక్రెయిన్ అనుసరించే వ్యూహాలకు అమెరికా ఎల్లప్పుడూ మద్దతుగా నిలుస్తుందన్న భావన ఉన్న వేళ.. రష్యా ఇంధన కేంద్రాలపై దాడులు చేయవద్దంటూ ట్రంప్ కుండబద్దలు కొట్టడం అంతర్జాతీయ స్థాయిలో విస్తృత చర్చనీయాంశంగా మారింది.