అమెరికా న్యాయ విభాగం తాజాగా విడుదల చేసిన ఎప్‌స్టీన్ ఫైల్స్‌లో ప్రముఖ దర్శకురాలు మీరా నాయర్ పేరు ప్రస్తావించబడిన ఒక ఈమెయిల్ వెలుగులోకి వచ్చింది. మీరా నాయర్ న్యూయార్క్ నగర మేయర్ అభ్యర్థి జోహ్రాన్ మమ్దానీ తల్లి.
ఈమెయిల్ సారాంశం: ఈ పత్రాల ప్రకారం, అక్టోబర్ 21, 2009న పబ్లిసిస్ట్ పెగ్గీ సీగల్, జెఫ్రీ ఎప్‌స్టీన్‌కు ఒక ఈమెయిల్ పంపారు. ఆ సమయంలో లైంగిక వేధింపుల కేసులో దోషిగా తేలిన ఘిస్లేన్ మాక్స్‌వెల్ తన టౌన్‌హౌస్‌లో ఒక పార్టీని ఏర్పాటు చేశారు. మీరా నాయర్ దర్శకత్వం వహించిన ‘అమెలియా’ (Amelia) చిత్రం స్క్రీనింగ్ తర్వాత ఈ ‘ఆఫ్టర్ పార్టీ’ జరిగింది.
ఆ ఈమెయిల్‌లో సీగల్ ఇలా రాశారు: “ఇప్పుడే ఘిస్లేన్ టౌన్‌హౌస్ నుండి బయటకు వచ్చాను. అక్కడ జరిగిన సినిమా పార్టీలో బిల్ క్లింటన్, జెఫ్ బెజోస్, దర్శకురాలు మీరా నాయర్ తదితరులు ఉన్నారు.” ఈ పార్టీలో ప్రముఖ నటులు హిల్లరీ స్వాంక్, రిచర్డ్ గేర్ కూడా పాల్గొన్నట్లు అందులో పేర్కొన్నారు.
తాజా వెల్లడి: అమెరికా డిప్యూటీ అటార్నీ జనరల్ టాడ్ బ్లాంచే తెలిపిన వివరాల ప్రకారం.. ఈ తాజా విడుదలలో 30 లక్షల పేజీల రికార్డులు, 2,000 వీడియోలు మరియు 1.8 లక్షల ఫోటోలు ఉన్నాయి. ఇందులో ఎలన్ మస్క్, ప్రిన్స్ ఆండ్రూ వంటి అనేక ఇతర ప్రముఖుల పేర్లు కూడా ఉన్నట్లు సమాచారం.