ఎమ్మెల్యే కారును చుట్టుముట్టి గుడ్లు, రాళ్లతో దాడి! కారు అద్దం పగలడంతో మధ్యలోనే వెనుదిరిగిన ఎమ్మెల్యే.. నడిరోడ్డుపై జరిగిన ఘటనతో కలకలం!

పశ్చిమ బెంగాల్‌లోని హుగ్లీలో తృణమూల్ కాంగ్రెస్ ఎమ్మెల్యే (నేత) కుణాల్ ఘోష్ కారుపై గుడ్లు, రాళ్లు రువ్విన ఘటన తీవ్ర కలకలం రేపింది.

శనివారం నాడు ముఖ్యమంత్రి మమతా బెనర్జీ పాల్గొనే ర్యాలీకి హాజరయ్యేందుకు ఆయన కారులో సెరాంపూర్ వెళ్తుండగా ఈ ఘటన జరిగింది. ఉత్తరపారా ప్రాంతంలో ఓ గుంపు ఆయన కారును చుట్టుముట్టి అడ్డుకోవడంతో పాటు, కుణాల్ ఘోష్‌కు వ్యతిరేకంగా నినాదాలు చేశారు. దీనికి సంబంధించిన వీడియో దృశ్యాలు సోషల్ మీడియాలో బయటకు వచ్చాయి.

ఆ వీడియోలో.. కొందరు వ్యక్తులు కుణాల్ ఘోష్ కారును చుట్టుముట్టి తలుపులను, కారు భాగాలను బాదడం, గుడ్లు, రాళ్లు విసరడం రికార్డయింది. ఈ దాడిలో కారు వెనుక అద్దం ధ్వంసమైనట్లు తెలుస్తోంది. ఈ ఘటన తర్వాత కుణాల్ ఘోష్ ర్యాలీకి వెళ్లకుండా మధ్యలోనే కోల్‌కతాకు తిరిగి వెళ్లిపోయారు. తన కారుపై రాళ్లు, గుడ్లు విసిరారని, ఘటన జరిగిన ప్రదేశంలో పోలీసులు ఎవరూ లేరని ఆయన ఆరోపించారు.

ఈ దాడికి బీజేపీయే కారణమని తృణమూల్ కాంగ్రెస్ నేతలు ఆరోపించారు. ఇది పథకం ప్రకారం జరిగిన దాడి అని టీఎంసీ (TMC) వర్గాలు పేర్కొన్నాయి. అయితే ఈ దాడికి ఎవరు బాధ్యులనే విషయాన్ని పోలీసులు ఇప్పటివరకు అధికారికంగా నిర్ధారించలేదు. మరోవైపు ఈ ఘటనపై బీజేపీ నేతలు భిన్నమైన వాదనలు వినిపిస్తున్నారు. దీంతో పశ్చిమ బెంగాల్‌లో రాజకీయ పార్టీల మధ్య మరోసారి ఉద్రిక్తత నెలకొంది.

కాగా, తమ పార్టీ శ్రేణులను ర్యాలీలో పాల్గొనకుండా అడ్డుకునే ప్రయత్నాలు జరుగుతున్నాయని మమతా బెనర్జీ ఆరోపించారు. ఈ నేపథ్యంలో కుణాల్ ఘోష్ కారుపై జరిగిన దాడిపై పోలీసులు దర్యాప్తు చేపట్టారు. దాడికి పాల్పడిన వ్యక్తులు ఎవరు? కారును అడ్డుకుని ఎందుకు దాడి చేశారు? అనే కోణంలో విచారణ జరుపుతున్నారు. కారును గుంపు చుట్టుముట్టి రాళ్లు, గుడ్లు విసురుతున్న వీడియో ప్రస్తుతం సోషల్ మీడియాలో వైరల్ అవుతోంది.