దేశంలో ఎల్‌పీజీ (LPG) కొరత ఉందంటూ వస్తున్న వదంతుల మధ్య ప్రభుత్వం కీలక స్పష్టతనిచ్చింది. గృహ అవసరాలకు వాడే గ్యాస్ సరఫరా పూర్తిగా సాధారణంగా ఉందని, ఎక్కడా ఎటువంటి కొరత లేదని తేల్చి చెప్పింది. వినియోగదారులకు ఎటువంటి అంతరాయం కలగకుండా చూడటం కోసం, మార్చి 5 నాటితో పోలిస్తే దేశీయ ఎల్‌పీజీ ఉత్పత్తిని సుమారు 30 శాతం పెంచినట్లు పెట్రోలియం మంత్రిత్వ శాఖ వెల్లడించింది.
ప్రభుత్వ సమాచారం ప్రకారం, దేశవ్యాప్తంగా ఉన్న సుమారు 25,000 మంది ఎల్‌పీజీ డిస్ట్రిబ్యూటర్లలో ఎవరి వద్ద కూడా గ్యాస్ సరఫరా నిలిచిపోలేదు. వంట గ్యాస్ లభ్యతను కాపాడేందుకు అదనపు చర్యలు తీసుకున్నామని, అవసరమైన చోట అదనపు కిరోసిన్‌ను కూడా విడుదల చేశామని పేర్కొంది.
పెట్రోలియం మంత్రిత్వ శాఖ సంయుక్త కార్యదర్శి సుజాతా శర్మ మాట్లాడుతూ.. ప్రజలు పుకార్లను నమ్మవద్దని, భయాందోళనతో (Panic Booking) బుకింగ్‌లు చేయవద్దని కోరారు. సాధారణంగా రోజుకు 50 నుండి 55 లక్షల (5 – 5.5 మిలియన్లు) బుకింగ్‌లు నమోదవుతుంటాయని, కానీ గత కొన్ని రోజులుగా ఈ సంఖ్య సుమారు 75 లక్షలకు (7.5 మిలియన్లు) చేరిందని ఆమె తెలిపారు. అంటే సుమారు 20 లక్షల అదనపు బుకింగ్‌లు నమోదయ్యాయని, ఇది కేవలం భయం వల్ల జరుగుతున్నదే తప్ప కొరత వల్ల కాదని ప్రభుత్వం స్పష్టం చేసింది.
పైపుడ్ నేచురల్ గ్యాస్ (PNG) మరియు వాహనాల కోసం వాడే సీఎన్‌జీ (CNG) సరఫరా 100 శాతం సామర్థ్యంతో కొనసాగుతోందని, ఎక్కడా కోతలు లేవని ప్రభుత్వం ధృవీకరించింది. అంతేకాకుండా, పెట్రోల్ మరియు డీజిల్ ఉత్పత్తిలో భారత్ స్వయంసమృద్ధి సాధించిందని ప్రభుత్వం పేర్కొంది. నల్లబజారుకు తరలించే వారిపై మరియు నిల్వ చేసే వారిపై కఠిన చర్యలు తీసుకుంటున్నట్లు మంత్రిత్వ శాఖ తెలిపింది.
‘258 మిలియన్ మెట్రిక్ టన్నుల రిఫైనింగ్ సామర్థ్యం’
ముడి చమురు (Crude Oil) విషయానికి వస్తే, దేశానికి 258 మిలియన్ మెట్రిక్ టన్నుల రిఫైనింగ్ సామర్థ్యం ఉందని సుజాతా శర్మ తెలిపారు. “మేము పెట్రోల్ మరియు డీజిల్ ఉత్పత్తిలో స్వయంసమృద్ధిగా ఉన్నాము. కాబట్టి, భారతదేశం ఈ ఇంధనాలను దిగుమతి చేసుకోవాల్సిన అవసరం లేదు” అని ఆమె స్పష్టం చేశారు. మన రిఫైనరీలన్నీ ప్రస్తుతం 100% లేదా అంతకంటే ఎక్కువ సామర్థ్యంతో పనిచేస్తున్నాయని, ముడి చమురు నిల్వలు పుష్కలంగా ఉన్నాయని ఆమె వివరించారు. ఈ పరిస్థితుల దృష్ట్యా ప్రజలు ఆందోళన చెందాల్సిన అవసరం లేదని ప్రభుత్వం భరోసా ఇచ్చింది.