ఏంటండీ ఇలా రోడ్డుపైకి వచ్చేశాయి.. రీఛార్జ్ చేసుకోవడానికి డబ్బుల్లేవు కాస్త భిక్ష వేయండి.! వీధిలో చేతులెత్తి నిలబడి భిక్షాటన చేస్తున్న రోబో.. చైనాలో వెలుగుచూసిన వింత పోకడ.!!

కృత్రిమ మేధ (AI), సాంకేతిక పరిజ్ఞానం శరవేగంగా అభివృద్ధి చెందుతున్న ఈ కాలంలో యంత్రాలు మనుషులకు సమానంగా అన్ని పనులనూ చేయడం మొదలుపెట్టాయి.

మనుషులు పెళ్లిళ్లు చేసుకున్నట్లుగానే రష్యాలోని మాస్కో నగరంలో ‘రాబర్ట్’, ‘మటిల్డా’ అనే రెండు రోబోలకు ఎంతో వేడుకగా వివాహం జరిపించారు. ఇప్పుడు అంతకుమించి అన్నట్లుగా, చైనాలో రోబోలు భిక్షాటన చేస్తున్న వింత వ్యవహారం ప్రపంచాన్ని ఆశ్చర్యానికి గురిచేస్తోంది.

చైనాలోని సిచువాన్ నగరానికి చెందిన ఒక సంస్థ రూపొందించిన ‘G1’ అనే హ్యూమనాయిడ్ (మానవ రూప) రోబో ప్రస్తుతం వీధుల్లో నిలబడి భిక్షాటన చేస్తోంది. రోడ్డుపై నిలబెట్టిన ఈ రోబో, అటుగా రాకపోకలు సాగించే వారిని చూసి చేతులు జోడించి మరీ భిక్ష అడుగుతోంది. “నాకు రీఛార్జ్ చేసుకోవడానికి డబ్బులు లేవు, దయచేసి ఏదైనా సహాయం చేసి వెళ్లండి” అని అందులో అమర్చిన మైక్ ద్వారా దీనంగా అడుగుతోంది.

ప్రజలు నగదు వేయడానికి ఆ రోబో కింద ఒక ప్లేట్ కూడా ఏర్పాటు చేశారు. చేతిలో నగదు లేనివారు తక్షణమే డిజిటల్ పద్ధతిలో డబ్బులు చెల్లించేందుకు వీలుగా ‘క్యూఆర్ కోడ్’ (QR Code) బోర్డును కూడా తగిలించారు. రోబో చేస్తున్న ఈ వినూత్న విన్యాసాన్ని చూసి ఆశ్చర్యపోతున్న జనం, ఆసక్తితో అందులో డబ్బులు వేసి వెళ్తున్నారు. దీనివల్ల ఈ రోబోకు ప్రతిరోజూ భారీ మొత్తంలో డబ్బులు వసూలవుతున్నట్లు చెబుతున్నారు.

సాంకేతికతను మనిషి సంపాదన కోసం ఎలాగైనా మార్చుకోగలడు అనడానికి రోబోలతో భిక్షాటన చేయిస్తున్న ఈ ఘటనే చక్కని ఉదాహరణ. మనుషులతో, జంతువులతో భిక్షాటన చేయించిన రోజులు పోయి.. ఇప్పుడు యంత్రాలను కూడా ఆ బాటలోకి దింపి కాసులు సంపాదిస్తున్న వింత ఆలోచన ప్రతి ఒక్కరినీ విస్తుపోయేలా చేస్తోంది.