చెన్నై: ఐపీఎల్ 2026లో చెన్నై సూపర్ కింగ్స్ (CSK) ప్రస్థానం అత్యంత దారుణంగా ప్రారంభమైంది. మహేంద్ర సింగ్ ధోనీ లేని ఈ జట్టు ఆడిన మొదటి రెండు మ్యాచ్‌ల్లోనూ ఓటమి పాలైంది. మినీ వేలంలో సిఎస్కే తీసుకున్న ఒక నిర్ణయం ఇప్పుడు ఆ జట్టు కొంప ముంచేలా కనిపిస్తోంది.
మినీ వేలంలో అన్‌క్యాప్డ్ ఆటగాళ్లయిన కార్తీక్ శర్మ మరియు ప్రశాంత్ వీర్ ఇద్దరినీ చెన్నై తలో ₹14.20 కోట్లు పెట్టి కొనుగోలు చేసింది. అంటే వీరిద్దరి కోసమే ఏకంగా ₹28.40 కోట్లు ఖర్చు చేసింది.
నీళ్లపాలైన ₹28 కోట్లు? డొమెస్టిక్ క్రికెట్‌లో కార్తీక్ శర్మ, ప్రశాంత్ వీర్ ప్రదర్శన బాగానే ఉన్నప్పటికీ, దిగ్గజ ఆటగాళ్లను వదిలేసి వీరిపై ఇంత భారీ మొత్తం ఖర్చు చేయడం అందరినీ ఆశ్చర్యపరిచింది. ప్రశాంత్ వీర్ తన టీ20 కెరీర్‌లో 9 మ్యాచ్‌ల్లో 12 వికెట్లు తీసి 118 పరుగులు చేయగా, కార్తీక్ శర్మ 12 మ్యాచ్‌ల్లో 334 పరుగులు చేశాడు. అంతగా అనుభవం లేని వీరిపై సిఎస్కే ఇంత పందెం కాయడం వెనుక ఉన్న వ్యూహం ఎవరికీ అర్థం కాలేదు.
తేలిపోయిన భారీ ధర ఆటగాళ్లు: మార్చి 30న రాజస్థాన్ రాయల్స్‌తో జరిగిన తొలి మ్యాచ్‌లో కార్తీక్ శర్మ అరంగేట్రం చేసి 15 బంతుల్లో కేవలం 18 పరుగులు మాత్రమే చేశాడు. ఇక ఏప్రిల్ 3న పంజాబ్ కింగ్స్‌తో జరిగిన రెండో మ్యాచ్‌లో కార్తీక్ (1 రన్), ప్రశాంత్ వీర్ (6 రన్స్) ఇద్దరూ నిరాశపరిచారు. వికెట్ కీపర్ బ్యాటర్ అయిన కార్తీక్, బౌలర్ అయిన ప్రశాంత్.. తమకు లభించిన అవకాశాలను సద్వినియోగం చేసుకోలేకపోయారు.
అదరగొట్టిన తక్కువ ధర ఆటగాళ్లు: ఒకవైపు కోట్లు పోసిన వారు విఫలమవుతుంటే, తక్కువ ధరకు వచ్చిన ఆటగాళ్లు మాత్రం అద్భుతాలు చేస్తున్నారు. ₹30 లక్షలకే జట్టులోకి వచ్చిన ఆయుష్ మ్హాత్రే పంజాబ్‌పై 43 బంతుల్లో 73 పరుగులు చేసి తన సత్తా చాటాడు. అలాగే ₹75 లక్షలకు చేరిన సర్ఫరాజ్ ఖాన్ కేవలం 12 బంతుల్లోనే 32 పరుగులతో మెరుపులు మెరిపించాడు. వీరి ప్రదర్శన చూస్తుంటే, సిఎస్కే మేనేజ్మెంట్ కార్తీక్ శర్మ, ప్రశాంత్ వీర్ విషయంలో తప్పుడు నిర్ణయం తీసుకుందా అనే అనుమానాలు వ్యక్తమవుతున్నాయి.