దేశ రాజధాని ఢిల్లీలో జరిగిన విద్యార్థుల ఆందోళనలో, పోలీసుల చర్యలను ఎదుర్కొంటూ చేతిలో ఎస్‌ఎఫ్‌ఐ జెండాతో పరుగెత్తుతున్న విద్యార్థిని పూజక్కల్ పవిత్ర ఫొటో ప్రస్తుతం సోషల్ మీడియాలో వైరల్‌గా మారింది. ఆమె ధైర్యం, తెగువపై నెటిజన్లు చర్చించుకుంటున్నారు.
కేరళకు చెందిన 20 ఏళ్ల పవిత్ర ఢిల్లీ యూనివర్సిటీలోని హన్స్‌రాజ్ కాలేజీలో ఆంత్రోపాలజీ చదువుతున్నట్లు సమాచారం. విద్యార్థుల హక్కుల కోసం ఆమె చేస్తున్న పోరాటం ఇప్పుడు దేశవ్యాప్తంగా చర్చనీయాంశంగా మారింది.
ఢిల్లీలోని ఏకే జీ భవన్ నుంచి జంతర్ మంతర్ వరకు విద్యార్థులు శాంతియుతంగా ర్యాలీ నిర్వహించేందుకు ప్రయత్నించారు. అయితే పోలీసులు వారిని అడ్డుకుని పలువురిని అదుపులోకి తీసుకోవడం ప్రారంభించారు.
ఈ క్రమంలో పోలీసులు మహిళా సిబ్బందిని పిలవాలని అరుస్తుండగా, తోటి విద్యార్థులను అరెస్టు చేస్తున్న సమయంలో పవిత్ర చేతిలో జెండా పట్టుకుని మరో దిశగా పరుగెత్తిన దృశ్యాలు కెమెరాల్లో రికార్డయ్యాయి. ఈ ఫొటోనే ప్రస్తుతం సోషల్ మీడియాలో విస్తృతంగా ప్రచారమవుతోంది.
ఆ తర్వాత ఆమెను కూడా పోలీసులు అదుపులోకి తీసుకుని బస్సులో ఉంచినట్లు కథనాలు పేర్కొంటున్నాయి. అయితే, ట్రాఫిక్ రద్దీని ఉపయోగించుకుని బస్సు నుంచి బయటకు వచ్చి తప్పించుకున్న ఆమె, మరుసటి రోజు మళ్లీ ఆందోళనలో పాల్గొన్నట్లు సమాచారం.
ఈ సందర్భంగా పవిత్ర మాట్లాడుతూ.. రాజ్యాంగం కల్పించిన ప్రజాస్వామ్య నిరసన హక్కును ప్రభుత్వం అణచివేస్తోందని, వ్యవస్థలో మార్పు రావాల్సిన సమయం ఆసన్నమైందని ఆగ్రహం వ్యక్తం చేసినట్లు కథనాలు వెల్లడిస్తున్నాయి.
విద్యార్థుల హక్కులు, న్యాయం కోసం జెండా పట్టుకుని నిలిచిన ఈ యువతి ధైర్యాన్ని పలువురు నెటిజన్లు ప్రశంసిస్తున్నారు. అధికారుల చర్యలకు వ్యతిరేకంగా విద్యార్థులు గళమెత్తుతున్న దృశ్యాలు మరోసారి చర్చకు దారితీశాయి.
Leave a Reply