కృష్ణగిరి జిల్లా ఉప్పారపల్లి గ్రామంలో రాజశేఖర్ (30) అనే వ్యక్తి తన తల్లి మంజుల (56)తో కలిసి చెరువులో దూకి ఆత్మహత్య చేసుకున్నాడు. చనిపోయే ముందు, తమను ఒకే సమాధిలో పాతిపెట్టాలని కోరుతూ తన స్నేహితులకు వాట్సాప్ మెసేజ్ పంపాడు. ఈ ఘటన వెనుక కర్ణాటకలో జరిగిన ఒక దారుణ హత్యోదంతం ఉందని పోలీసుల విచారణలో వెల్లడైంది.
విచారణలో బయటపడిన నిజం: మొదట్లో ఆస్తి తగాదాల వల్లే వారు ఆత్మహత్య చేసుకున్నారని అందరూ భావించారు. కానీ లోతైన విచారణలో అసలు విషయం బయటపడింది. రాజశేఖర్ బెంగళూరులో బ్యూటీ పార్లర్ నడుపుతున్న నళిని అనే మహిళతో ప్రేమలో ఉన్నాడు. వేరే మహిళను పెళ్లి చేసుకోవాలని నిర్ణయించుకున్న రాజశేఖర్, తన ప్రియురాలు నళినిని సజీవ దహనం చేసి హత్య చేశాడు.
పోలీసులకు భయపడి..: ఈ హత్య కేసులో కర్ణాటక పోలీసులు రాజశేఖర్ కోసం గాలింపు చేపట్టారు. పోలీసులకు దొరికితే కఠినమైన శిక్ష పడుతుందనే భయంతో, తప్పించుకునే మార్గం లేక తన తల్లిని కూడా వెంటతీసుకెళ్లి చెరువులో దూకి ఆత్మహత్య చేసుకున్నాడు. ఈ ఘటనపై పోలీసులు మరింత లోతుగా దర్యాప్తు చేస్తున్నారు.