క్రికెటర్ ఐపీఎల్ వైఫల్యం: బంగ్లాదేశ్ వికెట్ కీపర్-బ్యాట్స్మెన్ లిటన్ దాస్ (Litton Das), కోల్కతా నైట్ రైడర్స్ (KKR) జట్టుతో తనకు ఎదురైన అత్యంత చిన్న, నిరాశాజనకమైన ఐపీఎల్ కెరీర్ గురించి ఒక ముఖ్యమైన విషయాన్ని వెల్లడించాడు.
కేకేఆర్ ఫ్రాంచైజీలో తనకు దక్కాల్సిన నమ్మకం, మద్దతు ఎప్పుడూ లభించలేదని లిటన్ దాస్ మొదటిసారి బహిరంగంగా ఒప్పుకున్నాడు. అసలు ఆ జట్టుకు తన అవసరం లేదని తనకు మొదటి నుంచీ అనిపించిందని అన్నాడు. అన్నింటికంటే ఆశ్చర్యకరమైన విషయం ఏంటంటే.. తను ఆడిన ఏకైక ఐపీఎల్ మ్యాచ్ కంటే ముందు రోజు రాత్రి 11 గంటలకు అతనికి అకస్మాత్తుగా ఒక మెసేజ్ వచ్చింది. దాని గురించి కూడా అతను వివరించాడు.
కేకేఆర్కు నా అవసరం ఎప్పుడూ లేదు!
బంగ్లాదేశ్ క్రికెట్కు చెందిన ‘చార్ చోక్కా’ పోడ్కాస్ట్లో లిటన్ దాస్ మాట్లాడుతూ, కేకేఆర్ యాజమాన్యం అనుసరించిన కమ్యూనికేషన్ విధానాన్ని ప్రశ్నించాడు. “కేకేఆర్ జట్టుకు నా అవసరం లేదని నాకు అనిపించింది. జట్టు మేనేజ్మెంట్ నాకు ఆశించిన స్థాయిలో మద్దతు ఇవ్వలేదు” అని అన్నాడు. వరుసగా రెండు మ్యాచ్ల పాటు తనను బెంచ్కే పరిమితం చేశారని, అసలు తనకు ఎప్పుడు అవకాశం వస్తుందో కూడా ఎవరూ చెప్పలేదని లిటన్ స్పష్టం చేశాడు. సాధారణంగా ఆటగాళ్లకు తదుపరి మ్యాచ్ ఆడుతున్నారనే సమాచారం ముందుగానే ఇస్తారు. కానీ నా విషయంలో అలా జరగలేదు. అకస్మాత్తుగా రాత్రి 11 గంటలకు ‘నువ్వు రేపు ప్లేయింగ్ 11 లో ఆడుతున్నావు’ అని ఒక మెసేజ్ వచ్చింది. లిటన్ దాస్ చేసిన ఈ వ్యాఖ్యలు కేకేఆర్ మేనేజ్మెంట్ యొక్క ప్రొఫెషనలిజంపై సోషల్ మీడియాలో చర్చకు దారితీశాయి.
లిటన్ దాస్ ఐపీఎల్ అరంగేట్రం ఎప్పుడు జరిగింది?
లిటన్ దాస్ 2023 ఏప్రిల్ 20న ఢిల్లీ క్యాపిటల్స్ (DC) జట్టుపై ఐపీఎల్లోకి అరంగేట్రం (డెబ్యూ) చేశాడు. అతను జేసన్ రాయ్తో కలిసి ఇన్నింగ్స్ ప్రారంభించాడు, కానీ కేవలం 4 పరుగులకే అవుట్ అయ్యాడు. వికెట్ కీపింగ్లో కూడా అతను కొన్ని పెద్ద తప్పులు చేశాడు, అందులో కీలకమైన స్టంపింగ్ అవకాశాలను వదిలేయడం కూడా ఉంది. ఆ మ్యాచ్లో కేకేఆర్ ఓడిపోయింది, ఆ తర్వాత లిటన్ దాస్కు మరో అవకాశం రాలేదు. తన పేలవమైన అరంగేట్రం గురించి గుర్తు చేసుకుంటూ.. “నేను నా శాయశక్తులా ప్రయత్నించాను. క్రికెట్లో కొన్నిసార్లు మంచి జరుగుతుంది, కొన్నిసార్లు జరగదు. ఆ రోజు నాది కాదు. ఆ సమయంలో కేకేఆర్ జట్టు తమ ప్లేయింగ్ ఎలెవన్ మరియు విదేశీ ఆటగాళ్ల విషయంలో నిరంతరం మార్పులు చేస్తోంది. షకీబ్ అల్ హసన్ అప్పటికే టోర్నమెంట్ నుండి తప్పుకోగా, అతని స్థానంలో జేసన్ రాయ్ను జట్టులోకి తీసుకున్నారు” అని లిటన్ దాస్ తెలిపాడు.
ఆ సమయంలో కేకేఆర్ విడుదల చేసిన ప్రకటన
ఇలా లిటన్ దాస్ ఐపీఎల్ ప్రయాణం కేవలం ఒక్క మ్యాచ్కే పరిమితమైంది. అతనికి పెద్దగా అవకాశాలు రాలేదు. టోర్నమెంట్ ముగియడానికి ముందే అతను బంగ్లాదేశ్కు తిరిగి వెళ్లిపోయాడు. ఆ సమయంలో కేకేఆర్ యాజమాన్యం ఒక ప్రకటన విడుదల చేస్తూ.. “కుటుంబంలో మెడికల్ ఎమర్జెన్సీ (ఆరోగ్య సమస్యలు) కారణంగా లిటన్ దాస్ అత్యవసరంగా బంగ్లాదేశ్ వెళ్లాల్సి వచ్చింది. మా శుభాకాంక్షలు అతని కుటుంబానికి ఎల్లప్పుడూ ఉంటాయి” అని పేర్కొంది. ఆ తర్వాత కేకేఆర్ అతని స్థానంలో జాన్సన్ చార్లెస్ను జట్టులోకి తీసుకుంది.