15 ఏళ్ల క్రికెట్ సంచలనం వైభవ్ సూర్యవంశీ, అండర్-19 వరల్డ్ కప్ మరియు ఐపీఎల్ (IPL) 2026లో తన అద్భుత ప్రదర్శనతో దేశవ్యాప్తంగా హాట్ టాపిక్ అయ్యాడు. ప్రస్తుతం ఆరెంజ్ క్యాప్ రేసులో టాప్-5లో ఉన్న అతడిపై అంచనాలు భారీగా ఉన్నాయి.
అయితే, పారిస్ ఒలింపిక్స్ కాంస్య పతక విజేత మను భాకర్ పాల్గొన్న ఒక మీడియా సమావేశంలో సూర్యవంశీ ప్రస్తావన వస్తుందని ఎవరూ ఊహించలేదు. 24 ఏళ్ల మను భాకర్ ఎంతో సంయమనంతో ఆ ప్రశ్నకు సమాధానం ఇచ్చినప్పటికీ, ఒక ఒలింపిక్ విజేతను క్రికెటర్ గురించి అడగాల్సిన అవసరం ఏముందని నెటిజన్లు మండిపడుతున్నారు.
మను భాకర్ ఏమన్నారంటే? నేషనల్ రైఫిల్ అసోసియేషన్ ఆఫ్ ఇండియా (NRAI) 75వ వార్షికోత్సవ వేడుకల సందర్భంగా మను భాకర్ మాట్లాడుతూ.. చిన్న వయసులోనే విజయాలు సాధిస్తున్న వైభవ్ వంటి వారికి సరైన మార్గదర్శకత్వం (Mentorship) ఉండటం చాలా ముఖ్యమని చెప్పారు.
“మంచి గైడెన్స్, చుట్టూ మంచి వ్యక్తులు ఉంటే వయసు అనేది కేవలం అంకె మాత్రమే. ప్రతిభకు వయసుతో సంబంధం లేదు. అది ఆరు ఏళ్లకు రావచ్చు లేదా అరవై ఏళ్లకు రావచ్చు. వైభవ్కు సరైన మార్గదర్శకత్వం లభిస్తే అతడు భవిష్యత్తులో పెద్ద స్టార్ అవుతాడని నేను ఖచ్చితంగా చెప్పగలను” అని మను భాకర్ సమాధానమిచ్చారు.
నెటిజన్ల ఆవేదన: 2024 పారిస్ ఒలింపిక్స్లో 10 మీటర్ల పిస్టల్ ఈవెంట్ (సింగిల్స్ మరియు మిక్స్డ్ టీమ్) లో రెండు పతకాలు సాధించిన మను భాకర్ ఎక్కడా అసహనం వ్యక్తం చేయలేదు. కానీ, ఒక ఒలింపిక్ ఛాంపియన్ను క్రీడల గురించి లేదా ఆమె సాధించిన విజయాల గురించి అడగకుండా, క్రికెట్ గురించి ప్రశ్నించడం ఆమెను అవమానించడమేనని సోషల్ మీడియాలో (ముఖ్యంగా ‘X’) నెటిజన్లు ఫైర్ అవుతున్నారు. భారతదేశంలో క్రికెట్కు ఇస్తున్న ప్రాధాన్యత ముందు ఇతర క్రీడలు ‘సెకండ్ క్లాస్’ లాగా పరిగణించబడుతున్నాయని విమర్శలు వస్తున్నాయి.
వైభవ్ సూర్యవంశీ జోరు: గతేడాది ఐపీఎల్లో అడుగుపెట్టిన వైభవ్, గుజరాత్ టైటాన్స్పై 35 బంతుల్లోనే సెంచరీ బాది అందరి దృష్టిని ఆకర్షించాడు. అండర్-19 వరల్డ్ కప్ ఫైనల్లో 175 పరుగులు చేసి భారత్ కప్పు గెలవడంలో కీలక పాత్ర పోషించాడు. ఐపీఎల్ 2026లో ఇప్పటికే 8 మ్యాచ్ల్లో 357 పరుగులు చేశాడు. మొన్న సన్రైజర్స్ హైదరాబాద్పై 36 బంతుల్లోనే సెంచరీ చేయడంతో పాట్ కమిన్స్ సైతం అతడిని మెచ్చుకున్నారు. త్వరలో ఐర్లాండ్తో జరగనున్న టీ20 సిరీస్లో ఈ యువ సంచలనానికి చోటు దక్కే అవకాశం ఉంది.