ఒడిశా రాష్ట్రం బర్గఢ్ జిల్లా అతబీరా పరిధిలోని మెడికల్ చౌక్ సమీపంలో అతివేగంగా వచ్చిన బొలేరో వాహనం స్కూటర్ను ఢీకొన్న ఘటనలో ఓ మహిళ ప్రాణాలు కోల్పోయింది.
ఓ యువకుడు, మహిళ కలిసి స్కూటర్‌పై రోడ్డు దాటేందుకు ప్రయత్నిస్తుండగా, వెనుక నుంచి అతివేగంగా దూసుకొచ్చిన బొలేరో వాహనం వారిని బలంగా ఢీకొట్టింది. ఢీకొన్న తీవ్రతకు స్కూటర్‌పై ఉన్న ఇద్దరూ గాల్లోకి ఎగిరి రోడ్డుపై పడిపోయారు. ఈ భయానక ప్రమాద దృశ్యాలు సమీపంలోని సీసీటీవీ కెమెరాలో రికార్డయ్యాయి.
బయటకు వచ్చిన సీసీటీవీ ఫుటేజీలో.. ఇద్దరు వ్యక్తులు స్కూటర్‌పై రోడ్డు దాటుతుండగా, వెనుక నుంచి బొలేరో అత్యంత వేగంగా రావడం కనిపిస్తుంది. మరుక్షణంలోనే ఆ వాహనం స్కూటర్ను బలంగా ఢీకొట్టింది. దీంతో స్కూటర్‌పై ఉన్న ఇద్దరూ గాల్లోకి ఎగిరి రోడ్డుపై పడ్డారు. ప్రమాద తీవ్రతను కళ్లకు కట్టే ఈ దృశ్యాలు ప్రస్తుతం సోషల్ మీడియాలో వైరల్ అవుతున్నాయి.
ఈ ప్రమాదంలో స్కూటర్ వెనుక కూర్చున్న మహిళ అక్కడికక్కడే మృతి చెందినట్లు పోలీసులు తెలిపారు. మృతురాలిని రెంగాలీక్యాంప్ ప్రాంతానికి చెందిన దేవి ప్రసాద్ పాండాగా గుర్తించారు. స్కూటర్ నడుపుతున్న యువకుడు తీవ్ర గాయాలపాలవడంతో అతడిని చికిత్స నిమిత్తం ఆసుపత్రికి తరలించారు. ప్రస్తుతం వైద్యులు అతడి పరిస్థితిని పర్యవేక్షిస్తున్నారు.
ఈ ఘటనపై బాధిత కుటుంబ సభ్యులు ఇచ్చిన ఫిర్యాదు మేరకు అతబీరా పోలీసులు కేసు నమోదు చేసి దర్యాప్తు ప్రారంభించారు. ప్రమాదానికి కారణమైన బొలేరో వాహనాన్ని సీజ్ చేసి, డ్రైవర్‌ను అదుపులోకి తీసుకున్నట్లు సమాచారం. సీసీటీవీ ఫుటేజీని పరిశీలిస్తూ ప్రమాదం ఎలా జరిగిందనే కోణంలో పోలీసులు విచారణ జరుపుతున్నారు. వేగంగా వచ్చిన వాహనం ఢీకొని మహిళ మృతి చెందిన ఈ విషాద ఘటన స్థానికంగా తీవ్ర కలకలం రేపింది.