అమెరికా రాజకీయాల్లో అత్యంత ప్రభావవంతమైన వ్యక్తి డొనాల్డ్ ట్రంప్ పెద్ద కుమారుడు డొనాల్డ్ ట్రంప్ జూనియర్ వివాహం, ఆ తర్వాత బహామాస్ దీవుల్లో జరిగిన సంబరాలకు సంబంధించిన ఓ సంచలన వార్త వెలుగులోకి వచ్చింది.
ఈ వివాహ వేడుకల ఖర్చుల్లో కొంత భాగాన్ని రష్యా అధ్యక్షుడు వ్లాదిమిర్ పుతిన్‌కు అత్యంత సన్నిహితుడైన బిలియనీర్ ఉమర్ క్రెమ్లెవ్ భరించడం అంతర్జాతీయంగా తీవ్ర వివాదానికి దారితీసింది.
ట్రంప్ జూనియర్ భార్య బెట్టినా ట్రంప్, తమ పెళ్లి అనంతరం రెండు రోజుల పాటు జరిగిన విందు వినోదాల ఖర్చును ఉమర్ క్రెమ్లెవ్ చూసుకున్నారని స్వయంగా అంగీకరించారు. సోషల్ మీడియాలో పెట్టిన పోస్ట్‌లో క్రెమ్లెవ్‌ను తమ “ప్రియమైన స్నేహితుడు”గా అభివర్ణించిన బెట్టినా.. తమ వివాహానంతర రెండు రోజుల గ్రాండ్ పార్టీని ఆయనే నిర్వహించారని వెల్లడించారు.
‘ప్రోపబ్లికా’ (ProPublica) అనే పరిశోధనాత్మక వార్తా సంస్థ సంచలన నివేదిక వెలువరించిన తర్వాతే ఈ విషయాలు బయటకు వచ్చాయి. ఆ నివేదిక ప్రకారం, బహామాస్ దీవుల్లో జరిగిన ట్రంప్ జూనియర్ పెళ్లి వేడుకల కోసం ఉమర్ క్రెమ్లెవ్ లక్షలాది డాలర్లను వెచ్చించారు. మూడు రోజుల పాటు జరిగిన ఈ వేడుకల కోసం అద్దెకు తీసుకున్న రెండు ప్రైవేట్ దీవుల్లో ఒకదాని అద్దెతో పాటు, భారీ బాణసంచా ప్రదర్శన ఖర్చులన్నీ ఆ రష్యన్ బిలియనీరే చెల్లించారు.
ఈ వివాదంపై ఇన్‌స్టాగ్రామ్‌లో వివరణ ఇచ్చిన బెట్టినా ట్రంప్.. “ఇది మా స్నేహితుడు మాకిచ్చిన పెళ్లి కానుక. ఇందుకు ఆయనకు మేము ఎల్లప్పుడూ కృతజ్ఞులమై ఉంటాం” అని పేర్కొన్నారు. తమ అసలు వివాహం కుటుంబ సభ్యుల సమక్షంలో అత్యంత నిరాడంబరంగా, వ్యక్తిగతంగా జరిగిందని.. ఈ సంబరాలు స్నేహితులతో సరదాగా గడిపేందుకు ప్లాన్ చేసుకున్న సాధారణ వీకెండ్ పార్టీ మాత్రమేనని ఆమె వివరించారు.
వ్యక్తుల నేపథ్యాన్ని బట్టి ఒకరి వ్యక్తిగత ఆనంద వేడుకలను రాజకీయ లబ్ధి కోసం వాడుకోవడం, అనుమానాస్పదంగా చూడటం చాలా దురదృష్టకరమని ఆమె ఆవేదన వ్యక్తం చేశారు. ప్రతి స్నేహం వెనుకా రాజకీయ ప్రయోజనాలు ఉండాల్సిన అవసరం లేదని, బహుమతులు ఇచ్చే వారి ఔదార్యాన్ని ఎప్పుడూ శంకించకూడదని ఆమె సమర్థించుకున్నారు.
అయితే, ఉమర్ క్రెమ్లెవ్ నేపథ్యం ప్రస్తుతం అమెరికా రాజకీయాల్లో తీవ్ర దుమారం రేపుతోంది. ఆయన ఇంటర్నేషనల్ బాక్సింగ్ అసోసియేషన్ (IBA) అధ్యక్షుడిగా వ్యవహరిస్తున్నారు. రష్యా-ఉక్రెయిన్ మధ్య తీవ్ర యుద్ధం కొనసాగుతున్న తరుణంలో, ట్రంప్ కుటుంబానికి పుతిన్ అత్యంత సన్నిహితుడితో ఉన్న ఈ సంబంధాలు అంతర్జాతీయ వేదికపై పెను చర్చకు, ప్రశ్నలకు తావిస్తున్నాయి.
ఇటీవలే రష్యా అధ్యక్షుడు పుతిన్ చేతుల మీదుగా క్రెమ్లెవ్ ప్రతిష్టాత్మక ‘ఆర్డర్ ఆఫ్ ఫ్రెండ్‌షిప్’ అవార్డును అందుకున్నారు. అంతేకాకుండా, చైనా అధికారిక మీడియా కథనాల ప్రకారం.. పుతిన్‌తో కలిసి రష్యన్ ప్రతినిధి బృందంలో సభ్యుడిగా ఆయన చైనాలో కూడా పర్యటించడం గమనార్హం.