ఓపెన్‌ఏఐలో సాఫ్ట్‌వేర్ ఇంజినీర్‌గా పనిచేస్తున్న భారత సంతతికి చెందిన ఓ మహిళ, సంస్థ కార్యాలయంలోని కీలక సమావేశాలు జరిగే గదుల్లో ఎవరికీ తెలియకుండా ఆడియో రికార్డింగ్ పరికరాలను అమర్చినట్లు ఆరోపణలు వచ్చాయి. సంస్థ భద్రతా విభాగం ఆమె ప్రవర్తనపై అనుమానం రావడంతో విచారణ చేపట్టినట్లు కథనం పేర్కొంది.
వాట్సాప్ చాట్స్‌తో వెలుగులోకి వచ్చిందా?
ఆ మహిళ తన భర్తతో వాట్సాప్ సహా ఇతర మెసేజింగ్ ప్లాట్‌ఫామ్‌లలో జరిపిన సంభాషణలను పరిశీలించగా, సంస్థకు చెందిన రహస్య సమాచారాన్ని బయటివారికి చేరవేసేందుకు ప్రయత్నించినట్లు ఆధారాలు లభించాయని తమిళ కథనం పేర్కొంది. ఇందుకోసం పెద్ద మొత్తంలో డబ్బు తీసుకున్నారని, అనంతరం సౌదీ అరేబియాకు వెళ్లేందుకు ప్రణాళిక రూపొందించుకున్నారని కూడా ఆరోపించింది.
విమానం ఎక్కేలోపే పట్టుబడ్డారా?
విమానంలో వెళ్లి దేశం విడిచి వెళ్లేలోపే సంబంధిత అధికారులు ఆమెను అదుపులోకి తీసుకున్నట్లు కథనం వెల్లడించింది. అయితే, అరెస్టు జరిగిన తేదీ, అధికారిక కేసు వివరాలు, నిందితురాలి గుర్తింపు, అమెరికా దర్యాప్తు సంస్థల ప్రమేయం వంటి అంశాలకు సంబంధించిన విశ్వసనీయ ఆధారాలు ఈ కథనంలో స్పష్టంగా లేవు.
ఏఐ రంగంలో కార్పొరేట్ గూఢచర్యం ఆందోళనకరమే!
ప్రపంచవ్యాప్తంగా ఏఐ సంస్థల మధ్య పోటీ పెరుగుతున్న నేపథ్యంలో, సాంకేతిక రహస్యాలు, అంతర్గత సమాచారం, మేధో సంపత్తిని కాపాడుకోవడం కంపెనీలకు అత్యంత కీలకంగా మారింది. అయితే, ఈ ప్రత్యేక ఘటనలో నిజంగా గూఢచర్యం జరిగిందా, ఎవరైనా అరెస్టయ్యారా అనే విషయాలను అధికారిక ఆధారాలతో నిర్ధారించాల్సి ఉంది.
Leave a Reply