బరేలీ (ఉత్తరప్రదేశ్): డబ్బు మదం మనిషిని ఎంతలా అంధుడిని చేస్తుందనడానికి ఉత్తరప్రదేశ్లోని బరేలీలో జరిగిన ఈ ఘటనే సాక్ష్యం. కేవలం 1,200 రూపాయల అప్పు తిరిగి చెల్లించలేదనే కారణంతో, ఒక సంపన్న మహిళ రేషన్ దుకాణం ముందు అందరూ చూస్తుండగా ఒక పేద మహిళను చెంపదెబ్బలు కొట్టిన వీడియో ఇప్పుడు సామాజిక మాధ్యమాల్లో తీవ్ర ఆగ్రహానికి కారణమవుతోంది.
వీడియోలో ఏముంది? వైరల్ అవుతున్న వీడియోలో.. రేషన్ దుకాణం వెలుపల నిలబడి ఉన్న ఒక మహిళను, మరొక మహిళ వరుసగా ఐదుసార్లు చెంపపై కొట్టడం కనిపిస్తుంది. కొడుతున్నా కూడా ఆ పేద మహిళ ఎలాంటి ప్రతిఘటన చూపకుండా మౌనంగా నిలబడి ఉండటం చూసేవారి మనసు కరిగిస్తోంది. దుకాణం కౌంటర్ వద్ద ఉన్న ఒక వ్యక్తి ఏమీ చేయలేక నిస్సహాయంగా చూస్తుండటం కూడా వీడియోలో రికార్డ్ అయింది.
కాంగ్రెస్ నేత సుప్రియా శ్రీనేత్ ఆగ్రహం: ఈ వీడియో కాంగ్రెస్ జాతీయ అధికార ప్రతినిధి సుప్రియా శ్రీనేత్ దృష్టికి వెళ్లింది. ఆమె దీనిపై ఎక్స్ (X) వేదికగా స్పందిస్తూ.. “ఒక పేద మహిళ 1,200 రూపాయల అప్పు చేసినందుకు ఆమెను ఐదుసార్లు చెంపదెబ్బలు కొట్టారు. పేదరికం, నిస్సహాయత ఉన్నంత మాత్రాన ఒక సంపన్న మహిళ ఈ విధంగా ప్రవర్తించడం ఎంతవరకు సమంజసం?” అని ప్రశ్నించారు.
నెటిజన్ల స్పందన: ఈ వీడియోను షేర్ చేసిన ‘ఘర్ కే కలేష్’ అనే ఎక్స్ ఖాతాలో నెటిజన్లు తీవ్రంగా స్పందిస్తున్నారు.
- “అప్పుతో పాటు ఈ చెంపదెబ్బలకు కూడా ఆ మహిళ డబ్బులు వసూలు చేయగలదా?” అని ఒకరు ప్రశ్నించగా..
- “ఈ రోజుల్లో మనిషికి మనిషిపై కరుణ, మానవత్వం అనేవి చచ్చిపోయాయి” అని మరొకరు విచారం వ్యక్తం చేశారు.