మానవ శరీరంలో, ముఖ్యంగా ఊపిరితిత్తులలో ఒక ప్రత్యేకమైన ఫంగస్ పెరుగుతున్నట్లు ఇటీవల వెల్లడైంది. ఇది సాధారణ వ్యాధి కాదు, ‘ఆస్పెర్గిలోసిస్’ అని పిలిచే అత్యంత ప్రమాదకరమైన ఫంగల్ ఇన్ఫెక్షన్. సూక్ష్మదర్శిని (Microscope) కింద చూస్తే నీలి-ఆకుపచ్చ రంగులో పూలలా అందంగా కనిపించే ఈ ఫంగస్, లోపలికి ప్రవేశిస్తే మాత్రం మృత్యువుతో సమానం.
ఇది ఎలా వ్యాపిస్తుంది? శాస్త్రవేత్తల పరిశోధన ప్రకారం.. ఆస్పెర్గిలస్ ఫ్యూమిగేటస్, ఆస్పెర్గిలస్ ఫ్లేవస్ మరియు ఆస్పెర్గిలస్ నైజర్ అనే మూడు జాతుల ఫంగస్ గాలిలోకి సూక్ష్మ బీజాలను (Spores) వదులుతాయి. మనం శ్వాస తీసుకునేటప్పుడు ఇవి తెలియకుండానే లోపలికి వెళ్తాయి. ఆరోగ్యవంతుల్లో రోగనిరోధక శక్తి వీటిని నాశనం చేస్తుంది, కానీ ఇమ్యూనిటీ తక్కువగా ఉన్నవారికి ఇది ప్రాణాంతకంగా మారుతుంది.
ఎవరికి ప్రమాదం ఎక్కువ?
- క్యాన్సర్ రోగులు, అవయవ మార్పిడి చేసుకున్నవారు.
- హెచ్ఐవి బాధితులు లేదా ఆస్తమా, సీఓపీడీ వంటి దీర్ఘకాలిక ఊపిరితిత్తుల వ్యాధులు ఉన్నవారు.
- కోవిడ్ నుండి కోలుకున్న వారు (ఊపిరితిత్తులు దెబ్బతినడం వల్ల వీరికి ఇన్ఫెక్షన్ త్వరగా సోకుతుంది).
శరీరాన్ని ఎలా దెబ్బతీస్తుంది? ఈ ఫంగస్ ఊపిరితిత్తుల కణజాలాలను నాశనం చేస్తూ రక్తనాళాల్లోకి ప్రవేశించి శరీరం అంతా వ్యాపిస్తుంది. దీనిని ‘ఇన్వేసివ్ ఆస్పెర్గిలోసిస్’ అంటారు. సరైన మందులు వాడినా ఇందులో మరణాల రేటు 40 నుండి 90 శాతం వరకు ఉండటం ఆందోళనకరం. జ్వరం, దగ్గు, ఛాతీ నొప్పి, దగ్గినప్పుడు రక్తం పడటం వంటివి దీని లక్షణాలు. చాలాసార్లు దీనిని పొరపాటున టీబీ లేదా నిమోనియాగా భావించి తప్పుడు చికిత్స తీసుకునే అవకాశం ఉంది.
వాతావరణ మార్పుల ప్రభావం: గ్లోబల్ వార్మింగ్ కారణంగా పెరుగుతున్న ఉష్ణోగ్రతలు ఈ ఫంగస్ వ్యాప్తికి అనుకూలంగా మారుతున్నాయి. గతంలో చల్లగా ఉన్న ప్రాంతాల్లో కూడా ఇప్పుడు ఇది వేగంగా విస్తరిస్తోంది. భారత్ వంటి దేశాల్లో కాలుష్యం, వేడి పెరగడం వల్ల ఊపిరితిత్తుల వ్యాధులు పెరుగుతున్నాయి, తద్వారా ఈ ఫంగస్ ముప్పు కూడా పెరుగుతోంది. 2050 నాటికి ఈ కేసులు రెట్టింపు కావచ్చని అంచనా.
జాగ్రత్తలు మరియు చికిత్స:
- రోగనిరోధక శక్తి తక్కువగా ఉన్నవారు పాత ఇళ్లు, తేమ ఎక్కువగా ఉన్న ప్రదేశాలకు దూరంగా ఉండాలి.
- గార్డెనింగ్ లేదా మట్టితో పని చేసేటప్పుడు ఖచ్చితంగా మాస్క్ ధరించాలి (మట్టిలో ఈ ఫంగస్ ఎక్కువగా ఉంటుంది).
- దీని చికిత్సకు వాడే ‘వోరికోనజోల్’ వంటి యాంటీ ఫంగల్ మందులు చాలా ఖరీదైనవి మరియు సైడ్ ఎఫెక్ట్స్ కూడా ఎక్కువే.