పంజాబ్‌లోని జలంధర్‌లో ఓ యువకుడిపై కొందరు వ్యక్తులు దాడి చేసిన ఘటన కలకలం రేపింది. అయితే.. యువకుడిపై దాడి జరుగుతున్న సమయంలో ఓ వీధి కుక్క అకస్మాత్తుగా అక్కడికి దూసుకొచ్చి.. దాడి చేస్తున్న వ్యక్తినే తరిమికొట్టింది. ఈ ఘటనకు సంబంధించిన దృశ్యాలు ప్రస్తుతం సోషల్ మీడియాలో వైరల్ అవుతున్నాయి.
జలంధర్‌లోని కర్హా ప్రాంతంలో ఈ ఘటన జరిగినట్లు తెలుస్తోంది. రోడ్డుపై నిలబడి ఉన్న ఓ యువకుడిని కొందరు వ్యక్తులు ఒక్కసారిగా చుట్టుముట్టారు. మొదట కర్రలు, చేతులతో అతడిపై దాడి చేసినట్లు సమాచారం.
ఆ తర్వాత వారిలో ఒక వ్యక్తి పదునైన ఆయుధంతో గాయపడిన యువకుడిపై దాడి చేసేందుకు ముందుకు వచ్చినట్లు తెలుస్తోంది. అక్కడే ఏర్పాటు చేసిన సీసీటీవీ కెమెరాలో ఈ మొత్తం ఘటన రికార్డైంది.
యువకుడిని పలువురు కలిసి దాడి చేస్తున్న సమయంలో.. అక్కడే ఉన్న ఓ వీధి కుక్క ఒక్కసారిగా వారి వైపు దూసుకొచ్చింది. ముఖ్యంగా దాడి చేసేందుకు ముందుకు వచ్చిన వ్యక్తిపై కుక్క పడి అతడిని వెనక్కి వెళ్లేలా చేసింది.
అంతటితో ఆగకుండా.. ఆ వ్యక్తిని కుక్క కొంత దూరం వరకు తరిమింది. దీంతో అతడు అక్కడి నుంచి పరుగులు తీసినట్లు సీసీటీవీ దృశ్యాల్లో కనిపిస్తోంది. కుక్క అడ్డుపడటంతో యువకుడిపై మరింత దాడి జరగకుండా ఆగిపోయిందని స్థానికులు తెలిపారు.
ఈ దాడిలో యువకుడికి గాయాలయ్యాయి. అతడు రోడ్డుపై పడిపోగా.. శరీరం నుంచి రక్తం కారినట్లు సమాచారం. వెంటనే కుటుంబ సభ్యులు, స్థానికులు అతడిని ఆసుపత్రికి తరలించారు. ప్రస్తుతం అతడికి చికిత్స కొనసాగుతోంది.
ఘటనపై సమాచారం అందుకున్న పోలీసులు కేసు నమోదు చేసి దర్యాప్తు ప్రారంభించారు. సీసీటీవీ ఫుటేజ్‌ను పరిశీలించిన పోలీసులు.. దాడికి పాల్పడ్డారనే ఆరోపణలపై ముగ్గురిని అరెస్ట్ చేసినట్లు తెలిపారు.
అసలు ఈ దాడికి కారణం ఏమిటి? ఇరువర్గాల మధ్య ఏం జరిగింది? దాడిలో ఉపయోగించిన ఆయుధాలు ఏమిటి? అనే అంశాలపై పోలీసులు విచారణ చేస్తున్నారు. ఈ ఘటనలో మరెవరైనా పాల్గొన్నారా అనే కోణంలోనూ దర్యాప్తు కొనసాగుతోంది.
ఇదిలా ఉంటే.. యువకుడిపై దాడి జరుగుతున్న సమయంలో వీధి కుక్క అకస్మాత్తుగా దూసుకొచ్చి దాడి చేసిన వ్యక్తినే తరిమికొట్టిన దృశ్యాలు సోషల్ మీడియాలో వైరల్‌గా మారాయి.
Leave a Reply