కదులుతున్న రైలుపై రాళ్ల వర్షం! ముక్కలైన కిటికీ అద్దాలు.. ప్రయాణికుడికి గాయం.. అకస్మాత్తుగా ఆగిన ఎక్స్‌ప్రెస్.. మార్గమధ్యంలో షాకింగ్ ఘటన!

మహారాష్ట్రలో నాగ్‌పూర్-ముంబై దురంతో ఎక్స్‌ప్రెస్ రైలుపై గుర్తుతెలియని వ్యక్తులు రాళ్లు రువ్విన ఘటన కలకలం రేపింది.

సెప్టెంబర్ 25వ తేదీ రాత్రి సుమారు 8:27 గంటల సమయంలో, బోర్ఖేడి (Borkhedi) ప్రాంతాన్ని దాటుతుండగా రైలుపై బయటి నుంచి రాళ్లు విసిరినట్లు తెలుస్తోంది. ఈ ఘటనలో ఎ-1 (A-1), బి-2 (B-2), బి-5 (B-5) బోగీల కిటికీ అద్దాలు పగిలిపోయాయి. ఈ దాడిలో ఓ ప్రయాణికుడికి స్వల్ప గాయమైనట్లు సమాచారం.

రాళ్ల దాడితో రైలులోని ప్రయాణికులు తీవ్ర భయాందోళనకు గురయ్యారు. సమాచారం అందగానే రైలును వార్ధా (Wardha) స్టేషన్‌లో నిలిపివేశారు. అక్కడ రైల్వే ప్రొటెక్షన్ ఫోర్స్ (RPF), ప్రభుత్వ రైల్వే పోలీసులు (GRP) సుమారు అరగంట పాటు తనిఖీలు నిర్వహించారు. బోర్ఖేడి-సింధీ ప్రాంతాల మధ్య, సమీప గ్రామాల పరిసరాల్లో పోలీసులు గాలింపు చర్యలు చేపట్టారు. అయితే అనుమానాస్పద వ్యక్తులు గానీ, కచ్చితమైన ఆధారాలు గానీ లభించలేదు.

రైలు ఎస్కార్ట్ సిబ్బందిని, ప్రయాణికులను విచారించగా.. రైలు బయటి నుంచి ఏదో వస్తువు లేదా రాయి కిటికీకి బలంగా తగిలినట్లు తెలిపారు. దీంతో రైల్వే చట్టం కింద గుర్తుతెలియని వ్యక్తిపై కేసు నమోదు చేశారు. ఘటన జరిగిన ప్రదేశం, రాళ్లు విసిరిన వ్యక్తులు ఎవరనే దానిపై పోలీసులు దర్యాప్తు కొనసాగిస్తున్నారు.

రాళ్ల దాడి వల్ల రైలు సర్వీసుకు పెద్దగా అంతరాయం కలగలేదు. తనిఖీలు పూర్తయిన తర్వాత దురంతో ఎక్స్‌ప్రెస్ తిరిగి ముంబై వైపు బయలుదేరి వెళ్లింది. రైలుపై రాళ్లు విసరడానికి గల కారణం ఏమిటి, ఈ ఘటన వెనుక ఎవరున్నారనే కోణంలో అధికారులు విచారణ జరుపుతున్నారు. మరోవైపు, రైలుపై రాళ్ల దాడికి సంబంధించిన దృశ్యాలు మీడియాలో వైరల్ అవుతున్నాయి.