మహారాష్ట్రలోని థానే సమీపంలో ఉన్న కోప్రి ఫ్లైఓవర్‌పై నిర్మాణ పనుల కోసం వినియోగిస్తున్న భారీ ఇనుప రాడ్ల బోను (కేజ్), అటుగా వెళ్తున్న ఓ కారుపై కూలిన ఘటన తీవ్ర కలకలం రేపింది.
ఆనంద్ నగర్ – సాకేత్ ఎలివేటెడ్ రోడ్ ప్రాజెక్ట్ పనుల సమయంలో ఈ ప్రమాదం జరిగినట్లు వెల్లడైంది. ఇనుప నిర్మాణం కారు ముందు భాగంపై పడటంతో ముందు విండ్‌షీల్డ్ అద్దాలు నుజ్జునుజ్జయ్యాయి. ఇనుప రాడ్లు కారు లోపలికి చొచ్చుకుపోయినట్లున్న దృశ్యాలు బయటకు రావడంతో వాహనదారుల్లో తీవ్ర భయాందోళనలు వ్యక్తమయ్యాయి. ఈ ప్రమాదం కారణంగా ఆ మార్గంలో ట్రాఫిక్‌కు తీవ్ర అంతరాయం ఏర్పడింది.
ప్రమాదం జరిగిన వెంటనే కారులో ప్రయాణిస్తున్న వారి పరిస్థితిపై రకరకాల వార్తలు వెలువడ్డాయి. తొలుత కారులోని ఇద్దరు తీవ్రంగా గాయపడ్డారని వార్తలొచ్చాయి. అయితే, ముంబై మెట్రోపాలిటన్ రీజియన్ డెవలప్‌మెంట్ అథారిటీ (MMRDA) తర్వాత విడుదల చేసిన ప్రకటనలో, ఈ ఘటనలో ఎవరికీ గాయాలు కాలేదని స్పష్టం చేసింది. భారీ నష్టం జరిగినప్పటికీ ప్రాణనష్టం గానీ, గాయాలు గానీ కాకపోవడం ఊరటనిచ్చే విషయమైనా.. ప్రజలు నిత్యం రాకపోకలు సాగించే వంతెనపై ఇలాంటి నిర్మాణ సామగ్రి పడిపోవడం భద్రతా ప్రమాణాలపై తీవ్ర ప్రశ్నలను లేవనెత్తింది.
ఈ ఘటనపై తీవ్రంగా స్పందించిన MMRDA, ప్రాజెక్టును అమలు చేస్తున్న కాంట్రాక్టర్‌కు రూ.2 కోట్ల భారీ జరిమానా విధించింది. నిర్మాణ పనుల్లో భద్రతా నిబంధనల ఉల్లంఘనను ఎట్టిపరిస్థితుల్లోనూ సహించేది లేదని, ప్రజల భద్రతకే అత్యంత ప్రాధాన్యత ఇస్తామని అధికారులు తేల్చిచెప్పారు. దెబ్బతిన్న కారును అక్కడి నుంచి తొలగించారు. రోడ్డుపై పడిన భారీ ఇనుప నిర్మాణాన్ని కూడా క్రేన్ సహాయంతో పక్కకు జరిపి, ట్రాఫిక్‌ను క్రమబద్ధీకరించారు.
ఈ ఇనుప నిర్మాణం ఎలా కూలిపడింది, పనుల సమయంలో అవసరమైన భద్రతా చర్యలు తీసుకున్నారా లేదా, ఇందులో ఎవరి నిర్లక్ష్యం ఉంది అనే విషయాలను నిగ్గుతేల్చేందుకు సమగ్ర విచారణకు MMRDA ఆదేశించింది. విచారణలో భద్రతా లోపాలు ఉన్నట్లు తేలితే సంబంధిత వ్యక్తులపై కఠిన చర్యలు తీసుకునే అవకాశం ఉంది. అంతేకాకుండా, ఇలాంటి ఘటనలు పునరావృతం కాకుండా నిర్మాణ స్థలాల్లో భద్రతా మార్గదర్శకాలను పక్కాగా అమలు చేయాలని అధికారులు ఆదేశించారు. నిత్యం వాహన రద్దీ ఉండే రహదారులపై నిర్మాణ పనులు చేపట్టేటప్పుడు భద్రతా ప్రమాణాలు ఎంత ముఖ్యమో ఈ ఘటన మరోసారి గుర్తుచేసింది.
Leave a Reply