చెన్నై: “ఒక సమర్థవంతమైన ప్రతిపక్షంగా పనిచేయాలన్నదే నా కోరిక. అయితే పార్టీ ప్రయోజనాలను దృష్టిలో ఉంచుకుని కొన్ని కీలక నిర్ణయాలు తీసుకోబోతున్నాను. దానికి మీరంతా కట్టుబడి ఉండాలి. ఈ నెల 10వ తేదీ వరకు ఎమ్మెల్యేలు ఎవరూ చెన్నై వదిలి వెళ్లకూడదు. అందరూ చెన్నైలోనే ఉండాలి” అని డీఎంకే అధినేత స్టాలిన్ ఆదేశించారు. టీవీకే (TVK) మెజారిటీ నిరూపించుకోలేక ఇబ్బందులు పడుతున్న తరుణంలో స్టాలిన్ ఇచ్చిన ఈ ఆదేశాల వెనుక ఉన్న కారణాలపై ఆసక్తికరమైన చర్చ జరుగుతోంది.
తమిళనాడు రాజకీయాలు రోజురోజుకూ వేడెక్కుతున్నాయి. అసెంబ్లీ ఎన్నికల ఫలితాలు వెలువడినా సంచలనాలకు మాత్రం కొదవలేదు. ప్రతి గంటకూ రాజకీయ సమీకరణాలు మారిపోతున్నాయి. దీనికి ప్రధాన కారణం ఏ ఒక్క పార్టీకీ స్పష్టమైన మెజారిటీ రాకపోవడమే. విజయ్ నేతృత్వంలోని తమిళగ వెట్రి కళగం 108 నియోజకవర్గాల్లో విజయం సాధించి అతిపెద్ద పార్టీగా నిలిచింది. కానీ, ప్రభుత్వం ఏర్పాటుకు కావాల్సిన 118 మంది ఎమ్మెల్యేల మద్దతు లేకపోవడంతో విజయ్ ముఖ్యమంత్రి కాలేక సతమతమవుతున్నారు.
ఈ ఉత్కంఠ మధ్యే అన్నాడీఎంకే తన ఎమ్మెల్యేలను పుదుచ్చేరిలోని రిసార్ట్లో ఉంచింది. అక్కడ ఎడప్పాడి పళనిస్వామి వారితో చర్చలు జరుపుతున్నారు. ఇదిలా ఉండగా, ఈరోజు సాయంత్రం చెన్నైలోని అన్నా అరివాలయమ్ (డీఎంకే ప్రధాన కార్యాలయం)లో స్టాలిన్ కొత్తగా ఎన్నికైన ఎమ్మెల్యేలతో సమావేశమయ్యారు.
ఈ సమావేశంలో స్టాలిన్ మాట్లాడుతూ.. “మనం ఒక గొప్ప ప్రతిపక్షంగా ఉండాలన్నదే నా వ్యక్తిగత అభిప్రాయం. కానీ పార్టీ భవిష్యత్తు కోసం కొన్ని ముఖ్యమైన నిర్ణయాలు తీసుకోవాల్సి ఉంది. నేను ఏ నిర్ణయం తీసుకున్నా మీరంతా దానికి కట్టుబడి ఉండాలి. అందుకే ఎవరూ చెన్నై వదిలి వెళ్లవద్దు. ఈ నెల 10వ తేదీ వరకు ఇక్కడే ఉండండి” అని చెప్పారు. ఇప్పుడు ఇదే తమిళ రాజకీయాల్లో హాట్ టాపిక్ గా మారింది.
ఎందుకంటే, ఒకవేళ విజయ్ మెజారిటీ నిరూపించుకోలేకపోతే.. డీఎంకే మరియు అన్నాడీఎంకే కలిసి కూటమిగా ప్రభుత్వం ఏర్పాటు చేయవచ్చనే వార్తలు వస్తున్నాయి. డీఎంకే – అన్నాడీఎంకే కూటమికి మొత్తం 121 మంది ఎమ్మెల్యేల మద్దతు ఉంది. మెజారిటీకి కేవలం 118 మంది ఎమ్మెల్యేలు చాలు. వీరిద్దరూ కలిస్తే మెజారిటీ కంటే ఎక్కువ మంది సభ్యులు ఉంటారు. మరి స్టాలిన్ ఆదేశాలు ఈ దిశగానే ఉన్నాయా? అనే ప్రశ్న తలెత్తుతోంది.