చైనా నుండి ఇంగ్లాండ్‌కు సరకులతో బయలుదేరిన ‘దుబాయ్ టవర్’ అనే బ్రహ్మాండమైన నౌక, కొత్తగా కనుగొనబడిన ఆర్కిటిక్ సముద్ర మార్గం ద్వారా కేవలం 20 రోజుల్లోనే తన ప్రయాణాన్ని విజయవంతంగా పూర్తి చేసుకుంది.
సాధారణంగా మధ్యప్రాచ్య సముద్ర మార్గం ద్వారా ఇంగ్లాండ్ చేరుకోవడానికి 36 రోజులు పట్టే పరిస్థితి ఉండగా, ఈ కొత్త మార్గం ద్వారా సుమారు 16 రోజుల ప్రయాణ సమయం ఆదా కావడంతో పాటు 12,000 కిలోమీటర్ల దూరం కూడా తగ్గించబడింది.
చైనాలోని క్వింగ్డావో నగరం నుండి ఇంగ్లాడ్‌లోని టీస్‌పోర్ట్ నగరానికి వెళ్తున్న ఈ 574 అడుగుల పొడవైన సరుకు రవాణా నౌక, గత ఆగస్టు 19న ఆర్కిటిక్ మహాసముద్రం గుండా తన ప్రయాణాన్ని ప్రారంభించింది. ఆసియా మరియు ఐరోపాల మధ్య దూరాన్ని తగ్గించే ఉద్దేశంతో రష్యాతో కలిసి చైనా చేపట్టిన ఈ సాహసోపేతమైన సముద్ర మార్గ అన్వేషణ ప్రపంచ దేశాల దృష్టిని ఆకర్షించింది.
మధ్యప్రాచ్య దేశాలలో నెలకొన్న యుద్ధ ఉద్రిక్తతలను నివారించడానికి ఈ కొత్త ఆర్కిటిక్ మార్గం ఎంతో సహాయపడుతుందని భావిస్తున్నారు. అయినప్పటికీ, సంవత్సరంలో నిర్దిష్ట నెలలలో మాత్రమే దీనిని ఉపయోగించగలమనే నిబంధన కూడా ఉంది. అనగా, ఆగస్టు మరియు సెప్టెంబర్ నెలలలో మాత్రమే ఈ ప్రాంతంలో మంచు గడ్డకట్టే స్వభావం తక్కువగా ఉండటం వలన ప్రయాణం సాధ్యమవుతుంది. దీనికి విరుద్ధంగా, జూలై మరియు అక్టోబర్ నెలలలో ఏర్పడే భారీ హిమశైలాలను (మంచుకొండలను) బద్దలు చేసుకుంటూ వెళ్లడం నౌకలకు అతిపెద్ద సవాల్‌గా మారుతుంది.
అంతేకాకుండా, ఈ ఉత్తర సముద్ర మార్గంలో ఎక్కువ భాగం రష్యా తీర ప్రాంతానికి అనుకుని ఉండటం వల్ల, దీనిని ఉపయోగించే నౌకాయాన సంస్థలు రష్యాకు నిర్దిష్ట రుసుమలను చెల్లించవలసిన అనివార్యత ఉంది. 1990లలో ఆర్కిటిక్ పరిశోధనలను ప్రారంభించిన చైనా, ప్రస్తుతం ఈ వాణిజ్య మార్గం ద్వారా రష్యాతో తన దీర్ఘకాలిక స్నేహాన్ని మరియు ఆర్థిక సంబంధాలను మరింత బలపరుచుకుంటున్నట్లు గమనించదగ్గ విషయం.
Leave a Reply