రూ. 5.65 లక్షల ప్రారంభ ధరతో విడుదలైన నిస్సాన్ కొత్త 7-సీటర్ కారు ‘గ్రావిట్’ (Gravit) భారత మార్కెట్లో అమ్మకాల సునామీ సృష్టిస్తోంది. ఈ కారు విజయంతో నిస్సాన్ ఇండియా గత ఐదేళ్లలో ఎన్నడూ లేనంతటి దేశీయ వృద్ధిని నమోదు చేసింది.
జపాన్ కార్ల దిగ్గజం నిస్సాన్ మోటార్ ఇండియా, మార్చి 2026లో తన అత్యధిక దేశీయ విక్రయాలను నమోదు చేయడం విశేషం. దీనికి ప్రధాన కారణం ఇటీవల విడుదలైన కొత్త SUV/MPV మోడల్ “గ్రావిట్” అనడంలో సందేహం లేదు.
అమ్మకాల గణాంకాలు: మార్చి నెలలో నిస్సాన్ సంస్థ దేశీయంగా 4,408 యూనిట్లను విక్రయించింది. ఇది ఫిబ్రవరి నెల అమ్మకాలతో (2,230 యూనిట్లు) పోలిస్తే సుమారు 98% వృద్ధి. మొత్తం విక్రయాలను పరిశీలిస్తే, 10,388 యూనిట్లు అమ్ముడయ్యాయి. ఇందులో 5,980 యూనిట్లు ఇతర దేశాలకు ఎగుమతి చేయబడ్డాయి. తద్వారా అటు దేశీయంగా, ఇటు అంతర్జాతీయంగా సంస్థ మంచి వృద్ధిని కనబరుస్తోంది.
విజయానికి కారణం ఏంటి? నిస్సాన్ గ్రావిట్ విజయమే ఈ వృద్ధికి వెన్నెముకగా నిలిచింది. ఫిబ్రవరిలో విడుదలైన ఈ 7-సీటర్ కారు డెలివరీలు మార్చి 1 నుండి ప్రారంభమయ్యాయి. సబ్-4 మీటర్ల పొడవుతో రూపొందించబడిన ఈ ఫ్యామిలీ కారు, కేవలం రూ. 5.65 లక్షల (ఎక్స్-షోరూమ్) ధరకే లభిస్తుండటంతో, దేశంలోనే అత్యంత చౌకైన 7-సీటర్ కార్లలో ఒకటిగా నిలిచింది. ఇదివరకే పాపులర్ అయిన ‘మాగ్నైట్’ (Magnite) మోడల్‌తో కలిసి ‘గ్రావిట్’ సంస్థ అమ్మకాలను రెట్టింపు చేసింది.
భారత మార్కెట్‌పై దృష్టి: గతంలో నిస్సాన్ ఎక్కువగా ఎగుమతులపైనే ఆధారపడేది. కానీ మార్చి నెలలో దేశీయ విక్రయాలు పుంజుకోవడంతో రెండు మార్కెట్ల మధ్య సమతుల్యత ఏర్పడింది. నిస్సాన్ ఇండియా మేనేజింగ్ డైరెక్టర్ సౌరభ్ వత్స్ మాట్లాడుతూ, “వినియోగదారుల నుండి లభిస్తున్న అద్భుతమైన స్పందన మాకు ఎంతో నమ్మకాన్ని ఇస్తోంది” అని పేర్కొన్నారు.
ప్రస్తుతం భారత్‌లో తయారయ్యే నిస్సాన్ కార్లు 65 దేశాలకు ఎగుమతి అవుతున్నాయి. తన “ఇండియన్ రీనైసాన్స్ ప్లాన్” (Indian Renaissance Plan) ద్వారా మరిన్ని కొత్త మోడళ్లను ప్రవేశపెట్టాలని, దేశవ్యాప్తంగా ఉన్న 280కి పైగా సేవా కేంద్రాలను (Touch points) మరింత విస్తరించాలని నిస్సాన్ లక్ష్యంగా పెట్టుకుంది.