చెన్నై: అసెంబ్లీలో ప్రతిపక్ష నేత ఉదయనిధి స్టాలిన్ మాట్లాడుతూ.. ముఖ్యమంత్రి విజయ్ తనపై తనకు నమ్మకం లేకే రెండు నియోజకవర్గాల్లో పోటీ చేశారని విమర్శించారు. దీనికి సీఎం విజయ్ ఘాటుగా స్పందిస్తూ.. “మన విజయ ప్రభంజనం ఎలా ఉందో కొలత్తూర్ (స్టాలిన్ సొంత నియోజకవర్గం) సహా ఇతర చోట్ల చూసినా మీకు అర్థం కాలేదా?” అని ప్రశ్నించారు.
అంతేకాకుండా, “అధికార మదంతో రెచ్చిపోయిన 15 మంది డీఎంకే మంత్రుల ఓటమిని చూశాక కూడా మీకు ఇంకా బుద్ధి రాలేదా? వాస్తవాలు గ్రహించకుండా ఇలాగే కొనసాగితే, రాబోయే రోజుల్లో ప్రజలే డీఎంకేకు ఇంకా బాగా, లోతుగా బుద్ధి చెబుతారు” అని విజయ్ హెచ్చరించారు.
శాసనసభలో విశ్వాస తీర్మానం సందర్భంగా సీఎం విజయ్ చేసిన ప్రసంగం సారాంశం:
ప్రత్యక్ష ప్రసారాన్ని ఆపి చీకటి చేయలేదు
“నా గుండెల్లో కొలువైన తమిళ ప్రజలందరికీ నమస్కారం. నేడు అసెంబ్లీలో ప్రజా ప్రభుత్వంపై విశ్వాస తీర్మానాన్ని ప్రవేశపెట్టాం. దానిపై చర్చ జరిగింది. ప్రజలు అపారమైన నమ్మకం ఉంచిన మీ ప్రభుత్వాన్ని సమర్థిస్తూ, వ్యతిరేకిస్తూ పలు పార్టీల వారు మాట్లాడారు. కొందరు వాకౌట్ చేశారు. ఓటింగ్ నిర్వహించగా, ప్రభుత్వానికి మద్దతుగా 144 మంది సభ్యులు, వ్యతిరేకంగా 22 మంది ఓటు వేశారు. దీంతో తమిళ వెట్రి కళగం (TVK) ప్రభుత్వం ఘనవిజయం సాధించినట్లు స్పీకర్ ప్రకటించారు.
మా ప్రభుత్వం పారదర్శకంగా ఉంది. డీఎంకే హయాంలో లాగా ప్రతిపక్షాల గొంతు నొక్కడం లేదా ప్రత్యక్ష ప్రసారాన్ని నిలిపివేసి చీకటి చేయడం వంటి పనులు మేము చేయలేదు. ఇదంతా ప్రపంచం మొత్తం ప్రత్యక్ష ప్రసారంలో చూసింది.”
డీఎంకే ఓట్ల శాతం కేవలం 24.19 మాత్రమే
“అన్నీ తెలిసినట్లు విర్రవీగే డీఎంకేకు వాస్తవాలు ఎప్పటికీ అర్థం కావు. మా టీవీకే సాధించిన ఓట్ల శాతం 34.92 (దాదాపు 35%). కానీ, కూటమి పార్టీల ఓట్లతో గెలిచిన డీఎంకే వ్యక్తిగత ఓట్ల శాతం ఎంతో తెలుసా? కేవలం 24.19 శాతం మాత్రమే. అంటే ఒంటరిగా పోటీ చేసిన మా కంటే వారు 10 శాతం వెనుకబడి ఉన్నారు. ఓట్ల సంఖ్య పరంగా చూస్తే మాకు 1.72 కోట్ల ఓట్లు రాగా, డీఎంకేకు కేవలం 1.19 కోట్ల ఓట్లు వచ్చాయి. అంటే మేము డీఎంకే కంటే 52 లక్షల ఓట్లు అధికంగా సాధించాం.”
తిరస్కరణకు గురైన పార్టీ డీఎంకే
“శాతాల లెక్కన చూసినా 76 శాతం తమిళ ప్రజలు డీఎంకే తమకు అవసరం లేదని తేల్చి చెప్పారు. ఇంతలా ప్రజలచే తిరస్కరణకు గురైన పార్టీ, 35 శాతం ప్రజల మద్దతుతో గెలిచిన మమ్మల్ని చూసి ఎగతాళి చేయడం హాస్యాస్పదం. ప్రజలపై అప్పుల భారం మోపి, అది అభివృద్ధి కోసమే అని కబుర్లు చెప్పే డీఎంకే.. మా మద్దతును ‘అప్పు’గా అభివర్ణించడం విడ్డూరం.”
డీఎంకే విలవిలలాడటం ఖాయం
“మాకు మేజికల్ నంబర్ లేదని డీఎంకే విమర్శిస్తోంది. కానీ వారు చేయలేని ఎన్నో ప్రజాహిత పనులను మా ప్రభుత్వం అద్భుతంగా (Magical and Miracle) చేసి చూపిస్తుంది. మేము డిజిటల్ టెక్నాలజీని మాత్రమే నమ్ముకోలేదు, ప్రజల భావోద్వేగాలను నమ్ముకున్నాం.
ఓటమిలో మునిగిపోయిన డీఎంకే మాపై బురద జల్లడానికి ప్రయత్నిస్తుంది. మేము వాటిని పట్టించుకోం. లౌకిక, సామాజిక న్యాయ విధానాలకు మా ప్రభుత్వం కట్టుబడి ఉంటుంది. అది చూసి ఓర్వలేక డీఎంకే విలవిలలాడటం ఖాయం.”