తమిళనాడు తిరువారూరు జిల్లా కొరడాచ్చేరి సమీపంలోని ఒక చిన్న గ్రామంలో జరిగిన ఈ ఘటన తమిళనాడు ప్రజలను దిగ్భ్రాంతికి గురిచేసింది. 7 ఏళ్ల చిన్నారి నవీన్ ఇలాంటి పరిస్థితికి గురికావడంపై అందరూ ఆవేదన వ్యక్తం చేస్తున్నారు.
అసలేం జరిగింది?
ముత్తు – దేవి దంపతుల కుమారుడు నవీన్ (7) ప్రభుత్వ పాఠశాలలో మూడవ తరగతి చదువుతున్నాడు. ఆ దంపతులు తమ ఇంట్లో కోళ్లను పెంచుకుంటున్నారు. సుమారు 3 నెలల క్రితం ఒక అర్ధరాత్రి సమయంలో, కోళ్లను వేటాడటానికి ఒక ముంగీస్ (Mongoose) వారి ఇంట్లోకి వచ్చింది.
అక్కడ నిద్రిస్తున్న నవీన్ చేతిని ఆ ముంగీస్ కరిచింది. నొప్పితో కేకలు వేసిన చిన్నారిని తల్లిదండ్రులు వెంటనే ఆసుపత్రికి తీసుకెళ్లారు. అక్కడ ప్రాథమిక చికిత్స చేసి, గాయానికి మందులు వేశారు. కొద్దిరోజులకు గాయం తగ్గిపోవడంతో, నవీన్ యథావిధిగా బడికి వెళ్లడం, స్నేహితులతో ఆడుకోవడం చేశాడు.
ఒక్కసారిగా తిరగబడిన అనారోగ్యం
అయితే, గత 4 రోజుల క్రితం నవీన్‌కు అకస్మాత్తుగా జ్వరం వచ్చింది. సాధారణ జ్వరమే అని తల్లిదండ్రులు అనుకున్నప్పటికీ, సమయం గడిచేకొద్దీ అది తీవ్రమైంది. దీంతో భయపడిన తల్లిదండ్రులు తిరువారూరు ప్రభుత్వ ఆసుపత్రిలోని ఐసీయూలో చేర్పించారు.
వైద్యులు ఎంత ప్రయత్నించినప్పటికీ నవీన్‌ను కాపాడలేకపోయారు. 3 నెలల క్రితం ముంగీస్ కరిచినప్పుడు శరీరంలోకి చేరిన ఇన్ఫెక్షన్ (విషక్రిములు), ఇప్పుడు అతని ప్రాణాలను బలితీసుకున్నాయి. ఆరోగ్య శాఖ అధికారుల సమక్షంలో చిన్నారి అంత్యక్రియలు జరిగాయి.
ముంగీస్ కరిస్తే ప్రమాదమా?
సాధారణంగా ముంగీస్ మనుషులపై దాడి చేయదు. కానీ అది తనకి ప్రమాదం ఉందని భావిస్తేనే కరుస్తుంది. ముంగీస్ కి పాములాగా విషం ఉండదు, కానీ దాని నోటిలో ఉండే బ్యాక్టీరియా వల్ల తీవ్రమైన ఇన్ఫెక్షన్లు వచ్చే అవకాశం ఉంది. అలాగే రేబిస్ సోకే ప్రమాదం కూడా ఉంటుంది.
జంతువులు కరిచినప్పుడు ఏం చేయాలి?
వైద్యుల హెచ్చరికల ప్రకారం:
- జంతువు కరిచిన చోట వెంటనే శుభ్రమైన నీరు మరియు సోప్‌తో బాగా కడగాలి.
- గాయం పైన యాంటీ సెప్టిక్ మందు రాయాలి.
- గాయం లోతుగా ఉన్నా లేకపోయినా, వెంటనే డాక్టరును సంప్రదించి రేబిస్ వ్యాక్సిన్ మరియు టిటి ఇంజెక్షన్ తీసుకోవాలి.
- జ్వరం, వాపు లేదా నొప్పి వంటి లక్షణాలను అస్సలు నిర్లక్ష్యం చేయకూడదు.